Կառավարությունը գրեթե ձևավորված է․ իրավիճակային լուծումներ՝ համակարգային փոփոխությունների փոխարեն

Հայաստանի կառավարությունը գրեթե ձևավորված է։ Նախագահ Արմեն Սարգսյանը Նիկոլ Փաշինյանի առաջարկություններով նշանակել է երկու փոխվարչապետներ, և մեկ տասնյակ նախարարներ։ Առայժմ նշանակված չեն միայն արտաքին գործերի և բարձր տեխնոլոգիական արդյունաբերության նախարարները, որոնց նշանակումը, սակայն, չի ուշանա։ Բարձր տեխնոլոգիական արդյունաբերության նախարարի պաշտոնը կշարունակի զբաղեցնել Հայկ Չոբանյանը, իսկ ԱԳ նախարարի պաշտոնի համար դեռ վերջնական որոշում չկա։ Նիկոլ Փաշինյանն ամեն րոպե որոշում է փոխում, ու չի կողմնորոշվում՝ ո՞ւմ նշանակի, ԱԺ նախկին նախագահ Արարատ Միրզոյանի՞ն, թե՞ Անվտանգության խորհրդի նախկին քարտուղար, ներկայումս ԱԳ առաջին փոխնախարար նշանակված Արմեն Գրիգորյանին։ Երկուսից ում էլ նշանակի, առանձնապես մեծ տարբերություն չկա։

Կառավարության կազմը նայելով՝ կարելի է փաստել՝ խնդիրների համակարգային լուծումներ գտնելու փոխարեն Նիկոլ Փաշինյանը իրավիճակային լուծումներ է գտել, նախարարների նշանակել է միայն իրեն անձնապես հավատարիմ, սակայն մեծամասամբ ոլորտներին չտիրապետող անձանց։ Իհարկե, թե՛ նախկին, թե՛ նոր նախարարների մեջ կան այնպիսիք, որոնք Փաշինյանի չխանգարելու դեպքում կարող են արդյունավետ աշխատել, բայց նրանց համար առավել բարդ է լինելու։ Ի ծնե կասկածամիտ լինելով՝ Փաշինյանը յուրաքանչյուրի կողքին մեկ կամ մի քանի վերահսկոողներ է նշանակել որպես փոխնախարար, և տորպեդահարելու է բոլոր նախարարությունների աշխատանքը։ Մեր աղբյուրի փոխանցմամբ, գլխավոր խնդիրը, որ դրվելու է նախարարների առջև, գերատեսչություններում ընդդիմախոսներին լռեցնելը կամ հեռացնելն է լինելու։ Որևէ բարեփոխում չի իրականացվի առանց Նիկոլ Փաշինյանի գիտության և թույլտվության։ Փոխարենը նախարարներին հանձնարարվել է ցուցակագրել վարչապետին առանձնապես չհամակրող աշխատակիցներին (իսկ դրանք պետական ապարատի ահռելի մեծամասնությունն են), և միջոցներ ձեռնարկել այդ անձանցից ազատվելու ուղղությամբ։ Հատկապես խնդիրը սուր է դրված արդարադատության համակարգում։ Ռուստամ Բադասյանին չհաջողվեց իր ձեռքը վերցնել դատական համակարգը, և այժմ այդ պարտականությունը դրվել է նախկին օմբուդսմեն Կարեն Անդրեասյանի ուսերին։

Արեն Գինոսյան