Իրանական կողմը չի ցանկանում, որ նորից լայնամասշտաբ բախումներ լինեն Հայաստանի և Ադրբեջանի միջև
ՔԱՂԱՔԱԿԱՆՈՒԹՅՈՒՆ
Իրանը պատրաստ է միջնորդել հայ-ադրբեջանական բանակցությունների համար: Նման հայտարարություն է արել Իրանի ԱԳՆ պաշտոնական ներկայացուցիչ Սաիդ Խաթիբզադեն։ ԱԳՆ ներկայացուցիչը հայտարարել է տարածաշրջանում կայուն խաղաղության հաստատման համար ցանկացած օգնություն ցուցաբերելու` Իրանի պատրաստակամության մասին. հաղորդում է գերատեսչության մամուլի ծառայությունը: Նա նաև նշել է, որ երկու երկրներին անհրաժեշտ է հնարավորինս շուտ դադարեցնել սրումն ու բախումները և Հարավային Կովկասում հասնել հրադադարի:
Այս թեմայով զրուցել ենք իրանագետ Գարիկ Միսակյանի հետ։
Հարցին, թե արդյոք Իրանի մոտ այս անգամ կստացվի, քանի որ 44-օրյա պատերազմի ժամանակ էլ Իրանը փորձեց միջնորդել, սակայն ոչինչ չստացվեց` իրանագետը ասել է․ «Եթե ընդհանուր դիտարկենք իրանական կողմի հայտարարությունները, ապա կտեսնենք, որ արցախյան հակամարտության ողջ շրջանում և 44-օրյա պատերազմից հետո, Իրանը միշտ ցանկացել է ստանձնել միջնորդական առաքելություն, սակայն մինչ օրս հաջողություն չի ունեցել: Ներկա պահին Իրանի հայտարարությունները նախ միտված են, որ բացառվեն իրենց հյուսիսային սահմանում ավելի լայնամասշտաբ ռազմական բախումները: Այսինքն, իրանական կողմը չի ցանկանում, որ նորից լայնամասշտաբ բախումներ լինեն Հայաստանի և Ադրբեջանի միջև՝ հատկապես ելնելով նաև այն հանգամանքից, որ Թուրքիայի ազդեցությամբ կամ դրդմամբ Ադրբեջանը կարող է նաև Հայաստանի հանդեպ արդեն ոտնձգություններ անել և վտանգել ՀՀ միջազգայնորեն ճանաչված սահմանները, ինչն Իրանի համար վտանգ է համարվում: Իրանական կողմը, նաև հաշվի առնելով, որ 44-օրյա պատերազմից հետո Թուրքիան դե ֆակտո ներգրավված է Հարավային Կովկասի գոծընթացներում, ցանկություն ունի ներգրավվել, ու հենց այդ պատճառով էլ 3+3 ձևաչափն է առաջարկվում: Եվ եթե մինչև արցախյան երկրորդ պատերազմն ընկած ժամանակահատվածն իրանական կողմում տեսակետ կար, որ Հարավային Կովկասը ռուսական ազդեցության գոտի է, և պետք չէ Ռուսաստանի հետ մտնել հակասությունների մեջ՝ այս տարածաշրջանում, ապա Թուրքիայի մուտքից հետո իրանական կողմը չի ցանկանում հետ մնալ ու իր քաղաքական ներգրավվածության պատճառով էլ ձգտում է 3+3 ձևաչափին: Այն, թե ինչ կլինի, ձևաչափը կիրականանա՞, թե՞ ոչ՝ կախված է կողմերի, ինչպես նաև միջազգային խաղացողների ցանկությունից: Պետք է սպասենք նաև ՀՀ պաշտոնական կարծիքին»։
Սոնա Գիշյան
