Ադրբեջանը հետևողականորեն սրում է իրավիճակը

Ադրբեջանը հետևողականորեն սրում է իրավիճակը հայ-ադրբեջանական սահմանի տարբեր ուղղություններով։ Ադրբեջանի պաշտպանության նախարարության պնդմամբ՝ այս գիշեր հայ-ադրբեջանական սահմանի Գեղարքունիքի հատվածում Հայաստանի տարածքից ինտենսիվ կրակ է բացվել: Կիրակի օրը ևս Ադրբեջանի պաշտպանության նախարարությունը հաղորդել էր, թե հայկական կողմը կրակ է բացել Քելբաջարի ուղղությամբ տեղակայված մի քանի բնակավայրերի ուղղությամբ։

Հայաստանի պաշտպանության նախարարությունը սահմանային իրավիճակի մասին երեկվանից դեռ որևէ հաղորդագրություն չի տարածել։ Փոխարենը Քարվաճառի ուղղությամբ կրակոցների մասին հայտնել են «Գեոպրոմայնինգ Գոլդ» ընկերությունից։ Ընկերությունից նշել են, թե լարվածությունը մեծ է եղել հենց Սոթքի հանքի տարածքում, քանի որ սահմանն անցնում է հանքի հենց միջով։ Անկանոն կրակոցներ են հնչել։ Զինվորականների մեջ եղել է խնդիր, հնչել են անկանոն կրակոցներ, իսկ քանի որ աշխատակիցներն աշխատում են հենց սահմանին ու դիրքերին կպած, ընկերության ղեկավարությունը որոշում է կայացրել տարհանել աշխատակիցներին։ Աշխատակիցներից ոչ ոք չի տուժել, տարհանվել է շուրջ 150 աշխատակից։

Հայաստանի պաշտպանության նախարարությունը շարունակում է տեղեկությունները թաքցնելու արատավոր ավանդույթը, և հանրությունը ստիպված է ինֆորմացիան քաղել ադրբեջանական աղբյուրներից, կամ էլ տեղերում ապրող ու աշխատող անձանցից։ Տպավորություն է, թե Նիկոլ Փաշինյանի իշխանությունը տեղեկատվության կոծկումով փորձում է բթացնել հայ հանրության ուշադրությունը՝ թշնամուն տակտիկական առավելություն տրամադրելով։

«Արդեն 12 օր է, ինչ երկրի ռազմաքաղաքական ղեկավարությունը ոչինչ չի հաղորդում առաջնագծի Սոթք-Խոզնավար հատվածի, Սև լճի տեղամասում, անհայտ պատճառներով, անհետացած 2 հայ զինծառայողների մասին։ Թե սա ինչ վտանգավոր ազդանշաններ է փոխանցում հանրությանը սահմանագծի առանձին հատվածներում, զինված ուժերում տիրող իրավիճակի մասին, դեռ չեմ խոսի։ Չնայած առանց այդ էլ ամեն ինչ շատ պարզ է»,- այս արձանագրում էլ արել է ռազմական փորձագետ Տիգրան Աբրահամյանը։

Մարատ Պետրոսյան