ԱՄՆ-ում նույնասեռականների ռեկորդային քանակություն է բացահայտվել

News.am-ը գրում է.

Ֆլորիդայի Ատլանտյան համալսարանի, Սան Դիեգոյի ու Վայդեների համալսարանների հետազոտողները, ուսումնասիրելով ամերիկացիների շրջանում 1973-2014 թթ ժամանակահատվածում անցկացված խոշոր հարցման արդյունքները, հայտնաբերել են, որ այս ժամանակահատվածում նույնսեռականների շփումների մասին հաղորդագրությունների թիվը կրկնապատկվել է, իսկ նույնասեռականության նկատմամբ դրական վերաբերմունքը՝ քառապատկվել: Հոդվածը հրաապարակվել է Archives of Sexual Behavior ամսագրում:

Սոցիոլոգները ուսումնասիրել են, թե ժամանակի ընթացքում ինչպես է փոխվում նույնասեռ ու երկսեռ հարաբերությունների նկատմամբ հասարակական վերաբերմունքը, նաեւ գնահատել թե քանի ամերիկացիներ են խոստովանում, որ գոնե մեկ անգամ նույնասեռական հարաբերություն են ունեցել: Գիտնականները նաեւ հանգել են այն եզրակացության, որ նույնասեռականության նկատմամբ հայացքները պայմանավորված են հարցման մասնակիցների տարիքով:

Հետազոտությանը ընդհանուր առմամբ մասնակցել է մոտ քառասուն հազար մարդ: Ըստ հարցման արդյունքների, տղամարդկանց քանակը, որոն սեռական կապ են ունեցել նույն սեռի ներկայացուցիչի հետ աճել է 4.5-ից ու դարձել 8.2 տոկոս: Իսկ կանանց քանակը 3.6-ից աճել է ու 8.7 դարձել: Թե տղամարդկանց, թե կանանց հետ սեռական կապ ունեցողների քանակը 3.1-ից 7.7 տոկոս է դարձել:

Մարդկանց թիվը, որոնք հավանություն են տալիս նույնասեռականների հարաբերություններին 1973-ից մինչեւ 1990 թվականը գրեթե անփոփոխ է եղել ու կազմել է 13 տոկոս, իսկ հետո սկսել է անշեղորեն աճել՝ 2014-ին հասնելով 49 տոկոսի: 18-29 տարեկան երիտասարդները ( միլենիումի սերունդը) ավելի հանդուրժող են նույնասեռականության նկատմամբ: Նույնասեռական կապերին հավանություն տվողների թիվը երիտասարդների շրջանում 15-ից 63 տոկոս է դարձել:

Հետազոտության արդյունքները ցույց են տալիս, որ մշակութային փոփոխությունները վերջին մի քանի տասնամյակներին հանգեցրել են ոչ միայն նույնասեռականների հարաբերությունների նկատմամբ հասարակության հանդուրժողական վերաբերմունքին, այլեւ նպաստել, որ ավելի շատ մարդիկ համարձակորեն խոստովանեն, որ կապեր են ունեցել նույն սեռի ներկայացուցիչների հետ:

Միլենիումի սերունդ են համարվում նրանք, ովքեր ծնվել են 1981-ից հետո: ԱԱյս սերունդը նոր հազարամյակը դիմավորել է ավելի երիտասարդ տարիքում ու բնութագրվում է թվային տեխնոլոգիաների նկատմամբ խորը հետաքրքրությամբ: