Պուտին-Ալիև հանդիպում․ նոր մտահոգության առիթ ՀՀ իշխանությունների համար

Մոսկվայում երեկ կայացել է Ռուսաստանի և Ադրբեջանի նախագահներ Վլադիմիր Պուտինի և Իլհամ Ալիևի հանդիպումը, որտեղ, բնականաբար, քննարկվել է արցախյան հարցի կարգավորումն ու Հարավային Կովկասում ստեղծված իրավիճակը։ Հատկանշական է մի բան, որ Մոսկվա մեկնելուց առաջ Բաքուն ոչ միայն լարեց իրավիճակը Նախիջևանի ուղղությամբ, այլև հայտարարեց, թե ապաշրջափակումը պետք է լինի «բոլոր ճանապարհները միանգամից» սկզբունքով:

Եթե Նիկոլ Փաշինյանի հետ հանդիպմանը ՌԴ նախագահը խոսում էր «բարդ, սուր և զգայուն հարցերի» լուծման անհրաժեշտությունից, Ալիևի հետ հանդիպումն ավելի մեղմ էր, ավելին Պուտինը շնորհակալություն է հայտնել Ալիևին՝ ղարաբաղյան հարցում փոխզիջումային լուծումներ գտնելու համար։

«Ցանկանում եմ երախտագիտություն հայտնել Ձեզ, քանի որ գտնվում են փոխզիջումային լուծումներ։ Դրանք միշտ ամենաբարդն են լինում, բայց եթե մենք ուզում ենք, իսկ մենք՝ բոլորս, ուզում ենք, հասնել կարգավորման, ուրեմն պետք է գնանք այդ ճանապարհով։ Առայժմ դա մեզ հաջողվել է, ինչի համար ուզում եմ Ձեզ շնորհակալություն հայտնել», - ասել է Ռուսաստանի նախագահը։

Թե որոնք են այդ լուծումները և ինչ խնդիրների մասին է խոսքը՝ Ռուսաստանի նախագահը չի մանրամասնել։ Բայց ընդգծել է, որ Ալիևի հետ իր հանդիպման գլխավոր հարցը հենց ղարաբաղյան խնդիրն է և տարածաշրջանում ստեղծված իրավիճակը։ Մինչ Ադրբեջանը նոր սադրանքներ է կազմակերպում սահմանին, խոսում «միջանցքի», Զանգեզուրի, Երևանի և Սևանի՝ ադրբեջանական լինելու մասին, Երասխում տարբեր տրամաչափի զենքեր կիրառում՝ հայկական կողմի լիակատար ապիկարության պայմաններում, Ռուսաստանը շնորհակալություն է հայտնում Ալիևին։ Երկու նախագահներ նաև տնտեսական համագործակցության հարցերն են քննարկել, ուրախացել դրանց լավացումից և խորացումից։ Դեռ վաղ է որևէ կանխատեսում անելը, թե ինչ հետևանքներ կարող են լինել Հայաստանի համար այս հանդիպումից, սակայն միանշանակ է, որ որևէ դրական զարգացման սպասել չարժե։

Մանվել Թանդիլյան