«Գլուխը խփեք գետնին». Գեղամ Նազարյանը պատմեց իրեն բերման ենթարկելու մանրամասները

«Հայաստան» դաշինքի անդամ Գեղամ Նազարյանը չգիտի, թե իրեն ինչու են բերման ենթարկել։ Ոստիկանության Մաշտոցի բաժնի մոտ լրագրողների հետ զրույցում հայտնեց նա` նշելով, որ բերման ենթարկելիս որևէ բացատրություն չի տրվել։

Նրա խոսքով` Մաշտոցի բաժնում ոստիկանների վերաբերմունքն արդեն այլ է եղել, թեպետ այնտեղ ևս չեն իմացել, թե ինչու են իրեն բերման ենթարկել։

«Հետո թղթեր ներկայացրին, մի հեքիաթ էր գրված։ Որ իբր ես մասնակցել եմ ինչ-որ ակցիայի, չեմ ենթարկվել ոստիկանության օրինական պահանջին, որից հետո ինձ բերման են ենթարկել «Էրեբունի» պլազայի մատույցներից հետևիցս դավադիր հարձակումով՝ առանց ասելու, թե ինչու են բերման ենթարկում։ Ֆիզիկական անհամաչափ ուժի հետքերը մնում են»,- նշեց Նազարյանն ու ցույց տվեց ձեռքերի քերծվածքները։

Նրա խոսքով՝ բերման ենթարկելիս լսել է, որ ինչ-որ մեկն անընդհատ հրահանգել է՝ գլուխը գետնին խփեք։

Ըստ Նազարյանի` ոչ ոքին այդպես էլ չի հետաքրքրել, որ ինքը պատգամավորի թեկնածու է, կարելի՞ է արդյոք պատգմավորի թեկնածուին բերման ենթարկել։

Նա պատմեց, որ մինչև իրեն բերման ենթարկելու օպերացիան, ինքը տեսել է, թե ինչպես են երեք ոստիկաններ մի աղջկա ուղեկցում` «ձեռքերը ոլորած»։ Չի կարողացել լուռ անցնել և հեգնել է. «Անհարմար է, հայ աղջիկ է, Իլհամ Ալիևին չեք տանում»։ Կարծում է՝ դրանից հետո էլ հրահանգվել է իրեն էլ բերման ենթարկել՝ «գլուխը գետնին խփելով»։

Հիշեցնենք՝ Գեղամ Նազարյանն արցախյան 44-օրյա պատերազմում զոհված Աբգար Նազարյանի հայրն է։ Նա «Հայաստան» դաշինքի պատգամավորության թեկնածու է, ցուցակում 31-րդն է։

Ավելի վաղ հայտնել էինք, որ Նազարյանին այսօր բերման են ենթարկել Հանրապետության հրապարակից։