Վառելիքի գները թանկանալու են․ վարորդները նոր դժվարությունների առջև

Վառելիքի գինը Հայաստանում անշեղորեն աճում է՝ նորանոր խնդիրներ հարուցելով վարորդների և ազգաբնակչության համար, իսկ իշխանությունները ոչինչ չեն ձեռնարկում գները զսպելու ուղղությամբ։ Ընդ որում աճել և առաջիկայում էլ աճելու են ոչ միայն բենզինի և դիզվառելիքի, այլև բնական սեղմված և հեղուկ գազի գները։ Հայաստանյան լցակայաններում մեկ լիտր բենզինը արդեն վաճառվում է ռեգուլյար տեսակինը 480-490 դրամով, իսկ պրեմիում տեսակի բենզինը՝ 500-510 դրամով։ Նույնիսկ իշխանությունների սրտի օլիգարխ Խաչատուր Սուքիասյանի լցակայաններում գինն առանձնապես չի տարբերվում՝ 460-ից 480 դրամ՝ կախված տեսակից։

Գրեթե 20 տոկոսով ավելացել են հեղուկ գազի գները, աճելու են նաև սեղմված գազի գները։ Այս ամենը, ըստ մասնագետների, լրջագույն խնդիրներ է հարուցելու ընդհանուր տնտեսական վիճակի վրա։ Եթե այսօր Երևանում բնակվողները սկսել են բողոքել տաքսիների գների շեշտակի ավելացումից, ապա առաջիկայում այդ բողոքները կտարածվեն բոլոր ուղղություններով։ Վառելիքի աճի պայմաններում որևէ ապրանքի գին չի կարող նախկինը մնալ, արտադրողներն ու վերավաճառողները ստիպված են լինելու բարձրացնել բոլոր գները։

Իհարկե, խնդիրը միայն Հայաստանինը չէ, համաշխարհային շուկայում նավթի գները աճում են, գազի խոշոր մատակարար երկրներն էլ բարձրացնում են գազի գները՝ կապված պահանջարկի ավելացման հետ։ Միևնույն ժամանակ, Հայաստանի իշխանությունները բացարձակ անտարբերություն են դրսևորում, չեն էլ փորձում պարզել գների աճի պատճառները, քայլեր ձեռնարկել տնտեսության վատթարացումը կանխելու ուղղությամբ։ Փոխարենը, երկնիշ աճի թվեր են կրակում։ Բայց ոչ մի բառ վառելիքի, սնունդի, տնտեսական ապրանքների գների աճի մասին։ Թեպետ, ճիշտ էլ անում են, 54 տոկոս քվե ստացած իշխանությունը ինչ էլ ուզի, կանի։ Ափսոս, որ ֆինասական խնդիրները միայն նրանց ընտրողների վրա չէ, որ ազդում են։

Հակոբ Ներսիսյան