«Ինչպե՞ս դառնալ բռնապետ»․ Դավիթ Հարությունյանի ակնարկները
ՎԵՐԼՈՒԾՈՒԹՅՈՒՆՆԵՐ
Հայաստանի Սահմանադրական դատարանը երեկ գնաց խորհրդակցական սենյակ՝ արտահերթ խորհրդարանական ընտրությունների արդյունքները չեղարկելու պահանջով չորս քաղաքական ուժերի դիմումների ճակատագիրը որոշելու համար։
Իսկ մինչ այդ դիմումատուների ներկայացուցիչներն իրենց եզրափակիչ ճառերը ներկայացրին, մի վերջին անգամ փորձեցին ՍԴ դատավորներին բացատրել, թե ինչ ահռելի պատասխանատվություն է ընկած նրանց ուսերին։
Ամենափայլուն ելույթն ունեցավ Արդարադատության նախկին նախարար Դավիթ Հարությունյանը, նշեց, թե քարոզարշավի ընթացքում իշխանության կողմից բռնության սպառնալիքների, ատելության մթնոլորտի առիթով մարդու իրավունքների պաշտպանի արձագանքը պետք է առաջինը սթափեցներ հենց իշխանությանը, սակայն «Քաղաքացիական պայմանագիրը» դատարանում փորձում էր արժեզրկել ՄԻՊ դիտարկումները։
Դավիթ Հարությունյանը նաև համոզմունք հայտնեց, որ ՍԴ-ի կողմնորոշումն այս գործով ակնհայտ է։
«Օրերս սկսվեց հեռարձակվել «Ինչպե՞ս դառնալ բռնապետ» սերիալը։ Եթե Սահմանդրական դատարանի մասին օրենքը հնարավորություն ինձ տար, ապա այս դահլիճում դիտում կկազմակերպեի, և բոլորի համար հասկանալի կլիներ, թե ինչի մասին է մեր դիմումը։ Ուստի ուղղակի խորհուրդ եմ տալիս դիտել այդ սերիալը։ Ցավոք, այդ սերիալում կտեսնեք այսօրվա Հայաստանը»,- նշեց Հարությունյանը։
Նախկին նախարարը, նշենք, այս հայտարարությամբ չափազանց մեծ պատիվ է անում բռնապետի հակումներ դրսևորող Նիկոլ Փաշինյանին։ Netflix-ի վավերագրական սերիալը, որ թողարկվել է հուլիսի 9-ին, բաղկացած է վեց սերիաներից, և պատմում է Ադոլֆ Հիտլերի, Իոսիֆ Ստալինի, Իդի Ամինի, Կիմ Իր Սենի, Մուամար Քադաֆիի և Սադամ Հուսեյնի մասին։ Մարդկության պատմության այս վեց խոշոր բռնապետերի հետ Փաշինյանը համեմատության եզր իսկ չունի, ո՛չ ռազմական խոշոր հաղթանակներ է տարել, ո՛չ անձի պաշտամունք հիմնել, ո՛չ կարողացել տոտալ վերահսկել խոսքի ազատությունը, ո՛չ էլ կարողանում է այս անձանց պես հետապնդել իր քաղաքական հակառակորդներին։ Փաշինյանը առավելագույնը բռնապետի ծաղրանկար է։ Միգուցե, Դավիթ Հարությունյանն ակնարկում էր Մուամար Քադաֆիի և Սադամ Հուսեյնի անկումն ու ճակատագիրը, սակայն սա միայն ենթադրություն է, արդարադատության նախկին նախարարը այս մասին իր խոսքում չնշեց։
Տիգրան Վարդերեսյան
