Մեղքի զգացո՞ւմ, թե՞ յուրատեսակ կաշառք․ ԵՄ-ն 2,6 միլիարդ եվրո կտա Հայաստանին

Եվրամիությունը առաջիկա 5 տարիների համար Հայաստանին կհատկացնի 2,6 միլիարդ եվրո։ Հայաստանի փոխվարչապետի պաշտոնակատար Մհեր Գրիգորյանի հետ հանդիպմանը այս մասին Եվրոպական հանձնաժողովի հարևանության և ընդլայնման հարցերով հանձնակատար Օլիվեր Վարհեին ասել է, թե Հայաստանին հատկացվելիք 1,6 միլիարդ եվրոն այլ աղբյուրներով կավելացնի 1 միլիարդով՝ ընդհանուր ներդրումային փաթեթը դարձնելով 2,6 մլրդ եվրո։ Ներդրումային փաթեթի ծավալով Հայաստանն առաջատար է Ուկրաինայից և Վրաստանից, իսկ Ադրբեջանին տրվելու է ընդամենը 140 մլն եվրո։ Վարհեին ասել է, թե մոտ ապագայում Եվրամիությունը նաև 9-10 մլն եվրոյի մարդասիրական օգնություն կտրամադրի Լեռնային Ղարաբաղի հակամարտությունից տուժած անձանց, նաև Եվրամիությունը պատրաստ է աջակցել Ադրբեջանին և Հայաստանին տարածաշրջանում երկարաժամկետ խաղաղություն հաստատելու հարցում։ ԵՄ այս աջակցությունը աննախադեպ է և միայն կորոնավիրուսի հետ պայմանավորել պետք չէ։

Եվրամիությունը այսկերպ նախ փորձում է քավել իր մեղքերը՝ արցախյան 44-օրյա պատերազմում Հայաստանին չօգնելու և թշնամիների դեմ մենակ թողնելու համար։ Բացի այդ, եվրոպական չինովնիկները հասկանում են, որ պատերազմը խարխլել է իրենց ազդեցությունը, ժողովրդավարության և արևմտյան արժեքների նկատմամբ վստահությունը, ուստի հենց գումարով է փորձում շահել Հայաստանի քաղաքացիների սիրտը։ Գաղտնիք չէ, որ պարտված և տնտեսապես թուլացած երկրներից արտագաղթի ծավալները ահագնանում են, և ԵՄ-ն փորձում է այսկերպ նպաստել ՀՀ տնտեսության զարգացմանը, որպեսզի շատ հայաստանցիներ չհեռանան, հատկապես եվրոպական երկրներ։ Գումարը տալուն զուգահեռ՝ ԵՄ-ն նաև պետք է վերահսկի այդ գումարների ծախսման ուղղությունները։ Այլապես հերթական անգամ կստացվի, որ խոշոր գումար են տալիս ՀՀ բնակչությանը, փոխարենը դրա մի մեծ կտորը բաժին է հասնում ընդամենը մի փոքր խմբակի։

Մակար Նիկողոսյան