Փաշինյանի հետողորմյան․ երկու նախարարություններ վերականգնելու են

2018 թվականի իշխանափոխությունից հետո կառավարությունն օպտիմալացվեց, մի քանի նախարարություններ վերավեցին և ընդգրկվեցին այլ գերատեսչությունների կազմում։ Մասնագետները զգուշացնում էին, որ առնվազն երկու՝ գյուղատնտեսության և մշակույթի նախարարությունների օպտիմալացումը լուրջ խնդիրներ կառաջացնի, խնդրում Նիկոլ Փաշինյանին չգնալ նման քայլի։ Սակայն ԿԳ նախկին նախարար Արայիկ Հարությունյանի քմահաճույքները բավարարելու և նրան «սուպերնախարար» դարձնելու համար Նիկոլ Փաշինյանի իշխանությունը վերացրեց մշակույթի նախարարությունը, իսկ գյուղնախարարությունն էլ ընդգրկեցին Էկոնոմիկայի նախարարության կազմում։

 

Այսօր արդեն իշխանությունն ինքն է ստիպված արձանագրել, որ ձախողել են թե՛ գյուղատնտեսության ոլորտը, թե՛ մշակութային քաղաքականությունը։ Ներկայումս կառավարությունում քննարկվում է կառուցվածքային փոփոխությունների հարցը, և մի շարք նախարարություններ, որոնք 2018-ին միավորել էին, կրկին ուզում են առանձնացնել։ Նախարարությունների առանձնացումը նաև Փաշինյանին հնարավորություն կտա որոշ կողմնակիցների համար աշխատատեղ ու «պադավատ» ապահովել։ Ի դեպ, Փաշինյանը խիստ դժգոհ է Սփյուռքի հանձնակատարի գրասենյակից, ցանկանում է ամեն գնով ազատվել Զարեհ Սինանյանին և նրան հետ ուղարկել Միացյալ Նահանգներ։ Նախկին նախարարությունն այժմ ընդամենը մի բաժին կդառնա ԱԳՆ կազմում, և այն կհամակարգի նախկին նախարար Մխիթար Հայրապետյանը, որին մտադիր են նշանակել ԱԳ փոխնախարարի պաշտոնում։