Թռնողները․ «շուստրի» պաշտոնյաներն ապագա չեն տեսնում Փաշինյանի հետ
ՎԵՐԼՈՒԾՈՒԹՅՈՒՆՆԵՐ
Արտահերթ խորհրդարանական ընտրություններից հետո նիկոլ Փաշինյանը դեռ չի հասցրել նոր խորհրդարան և կառավարություն ձևավորել, սակայն նրա առավել խորամանկ կուսակիցներն արդնե ճամպրուկային տրամադրությունների մեջ են՝ գիտակցելով, որ Նիկոլ Փաշինյանի հետ ապագա չկա։
Երեք տարի զբաղեցնելով փոխվարչապետի պաշտոնը, ԶԼՄ էջերում բազմիցս հայտնվելով սկանդալային և կոռուպցիոն գործարքների դեպքերով՝ փոխվարչապետ Տիգրան Ավինյանը հեռանում է կառավարությունից և տեղափոխվում մասնավոր ոլորտ։
Փաշինյանի կառավարությունը հպարտանում էր, որ 29-ամյա անփորձ երիտասարդին նշանակել է երկրի գլխավոր պաշտոններից մեկում։ Ավինյանն այս ողջ ընթացքում չի կարող հպարտանալ պետության համար որևէ լուրջ ձեռքբերմամբ, կատարած բարեփոխումով, արտերկրից բերած ներդրումով; Փոխարենը կհպարտանա ճիշտ ժամանակին Փաշինյանի իշխանությունը լքելու հնարամտության համար։
Փաշինյանի հետ երկրի կառավարումը ձախողելու պատասխանատվությունից փորձում է խուսափել նաև մեկ այլ առաջատար դեմք՝ ԱԺ նախագահ Արարատ Միրզոյանը։ Վերջինս թեև մամուլով տարածում է, թե նեղացած է Նիկոլ Փաշինյանից, որ այս անգամ չեն գնահատել իր վաստակը և զրկում են երկրի երկրորդ պաշտոնը զբաղեցնելու հնարավորությունից, շատ էլ ուրախ է նոր հեռանկարով։ Արարատ Միրզոյանին առաջարկվել է շարքային պատգամավորի մանդատը փոխարինել ՌԴ-ում Հայաստանի դեսպանի պաշտոնով, բայց նա նախընտրում է լինել մեկը 71-ից, որպեսզի առանձնապես աչքի չընկնի և ժամանակին հասցնի թռչել իշխանության խորտակվող նավից։
Փաշինյանի մի քանի մտերիմներ էլ օտար երկրներում դեսպանի պաշտոն են ապսպրում, որպեսզի վտանգավոր զարգացումների ժամանակ հեռու լինեն Հայաստանից։ Որքան էլ հանրության մեջ ամրացած կարծիք կա, թե «Քաղաքացիական պայմանագիրն» անփորձ և ապիկար անձանց հավաքույթ է, նրանց մեջ էլ կան անձինք, ովքեր հասկանում են, թե ուր են հասցրել Հայաստանի Հանրապետությունը իրենց դավաճանական կեցվածքով, և առավել «շուստրիները» փորձեր են ձեռնարկելու Նիկոլ Փաշինյանից զատվելու, պարտության պատասխանատվությունն իրենց ուսերից նետելու, օտար երկրներում կամ հենց թեկուզ Հայաստանում շառից-փորձանքից հեռու ապրելու համար։
Միայն թե, դա չափազանց բարդ կլինի․ հայ ժողովուրդը հիշողության հետ կապված խնդիրներ չունի, իրավապահները՝ առավել ևս։
Սոս Հակոբյան
