Շիշբռնողները՝ Նիկոլ Փաշինյանի անձեռնմխելիների կաստան
ՎԵՐԼՈՒԾՈՒԹՅՈՒՆՆԵՐ
Հատուկ քննչական ծառայությունը որոշում է կայացրել հանցակազմի բացակայության հիմքով մերժել քրեական գործի հարուցումը՝ ԱԺ պատգամավոր Հայկ Սարգսյանի կողմից «Հրապարակ» օրաթերթի թղթակից Անուշ Դաշտենցի մասնագիտական գործունեությունը խոչընդոտելու, նրա հեռախոսը խլելու, ապակոդավորելու և տեսանյութը ջնջելու դեպքի առիթով։ «Իմ քայլը» խմբակցության պատգամավոր Հայկ Սարգսյանը՝ հայտնի Շիշ բնռող մականունով, հիշեցնենք, հունիսի 3-ին խլել էր լրագրող Անուշ Դաշտենցի հեռախոսը, երբ վերջինս հարցեր էր տվել նրան։ Սարգսյանը փախել էր, իսկ հեռախոսը վերադարձրել էին միայն ժամեր անց: Օրենքի և իրավունքի դիկտատուրայի մասին տարփողող Փաշինյանի սույն մերձավորը, նշենք, առաջին անգամը չէ, որ հայտնվում է սկանդալների կենտրոնում, ցուցադրում իր անզուսպ վարքը, խախտում քրեական օրենսգրքի մի քանի հոդվածներ, սակայն որևէ պատասխանատվության չի ենթարկվում։ Շիշ բռնողի այս արարքը դատապարտել են լրագրողական կազմակերպությունները, լրատվամիջոցները, անհատ իրավապաշտպաններ և հայտնի անձինք, սակայն նա դարձել է անձեռնմխելի, Նիկոլ Փաշինյանը հանձնարարել է չդիպչել իր պլաստիկե շշի պատասխանատուին։ Սարգսյանը նաև դարձել է իշխանական ֆեյքաֆաբրիկայի հերոսը։
Իշխանության սազանդարները նրա հանցավոր արարքներն արդարացնում են՝ որպես հակափաստարկ հիշեցնելով նախկինների օրոք կատարված ապօրինությունները, որոշ առանձնակների սանձարձակ վարքը։ Նախկինների սանձարձակներին փոխարինել են փաշինյանական սանձարձակները։
«Իրազեկ քաղաքացիների միավորման» նախագահ Դանիել Իոաննիսյանն անգամ երեկ ստիպված էր արձանագրել․ «ԱԺ պատգամավոր Հայկ Սարգսյանը լրագրողի գործունեությանը ակնհայտ խոչընդոտում է` գործ չի հարուցվում։ ԱԺ պատգամավոր Հայկ Սարգսյանը ակնհայտ ապօրինի հարստանում է` գործ չի հարուցվում։ Կներեք, ԱԺ պատգամավոր Հայկ Սարգսյանը ումի՞ց է ստացել ինդուլգենցիա։ Նիկոլ Փաշինյանի՞ց»։
Մեր կողմից պատասխանենք Իոաննիսյանին՝ այո, հենց Փաշինյանից։ Առանց նրա գիտության ու թույլտվության իր իշխանության որևէ ներկայացուցիչ չէր հատի ողջամտության սահմանները, իրեն թույլ չէր տա լկտիանալ։ Վարչապետի տխրահռչակ պաշտոնակատարը հենց ինքն է խրախուսում նման վարքը, հավասարություն քարոզում, հետո էլ ապացուցում, որ որոշներն ավելի «հավասար» են, քան մյուսները։
Գարիկ Սանթրոսյան
