ՀԱՊԿ-ն պաշտոնապես մերժեց Հայաստանին․ ի՞նչ արձագանք կտա Փաշինյանը

Ամիսներ տևած տվայտանքներից հետո Հավաքական անվտանգության պայմանագրի կազմակերպությունը վերջապես որոշեց պատասխանել և պաշտոնապես մերժեց Հայաստանի դիմումը։ ՀԱՊԿ գլխավոր քարտուղար Ստանիսլավ Զասը հայտարարեց, թե ՀԱՊԿ ներուժը կարող է օգտագործվել միայն ագրեսիայի դեպքում, իսկ Սյունիքի պարագայում գործ ունեն միայն «աննշան» սահմանային միջադեպի հետ։ Հայկական կողմն, ըստ էության, բովանդակային պատասխան չի տվել այս վիրավորանքին։ Իշխանությունների կոմպետենտության բացակայության մասին է խոսում այն փաստը, որ մեր երկիրը պատրաստ չէր նման պատասխանի, և այժմ չգիտեն, թե ինչպես արձագանքեն։ ՀԱՊԿ-ին կոշտ արձագանքելու դեպքում կարող են զայրացնել ռազմավարական գործընկեր Ռուսաստանին, իսկ չպատասխանելը, մեղմ ասած, անհեթեթ կդիտվի։ Արդյունքում արձագանքեց ԱԺ արտաքին հարաբերությունների հանձնաժողովի նախագահ Ռուբեն Ռուբինյանը։

Անփորձ այս առանձնյակը «Ազատության» եթերում հայտարարել է, թե Զասի հայտարարությունը տարօրինակ է։ Արձանագրելով, որ ՀԱՊԿ-ն ունի պարտավորություն արձագանքել ոչ միայն ուղիղ ագրեսիային կամ այսպես ասած ռազմական գործողություններին, այլ նաև ՀԱՊԿ անդամի տարածքային ամբողջականությանը, ինքնիշխանությանը և անվտանգությանը առկա սպառնալիքի դեպքում, Ռուբինյանը որևէ բառով չի նշում, թե ինչպես է արձագանքելու Հայաստանը հասցված վիրավորանքին և պարտականությունների չկատարմանը։ Ընդամենը հայտարարել է, թե Հաաստանը շարունակելու է աշխատանքներ տանել ՀԱՊԿ-ի հետ։ Մի կողմ թողնենք, որ Հայաստանում արտաքին քաղաքականությամբ զբաղվում են Ռուբինյանի որակի գործիչները, որոնք նույնիսկ սեփական երկրի շահերն են ստորադասում։ Մեր երկիրը նույնիսկ ԱԳՆ չունի՝ համապատասխան պարզաբանումներ պահանջելու համար։ Միգուցե, ԱԳ նախարարի և փոխնախարարների ազատումը, արտաքին քաղաքական գերատեսչությունը պարզապես ջախջախելը հենց այս նպատակով էր, որ Փաշինյանի իշխանությունն իրեն հասցված այս ապտակն էլ կարողանա սղացնել։ Փաստացի, մեր իշխանությունը այս հարվածն էլ կուլ կտա, ինչպես բազմաթիվ այլ հարվածներ է կուլ տվել։

Նարեկ Միքայելյան