Փոքրիկ «դիկտատորի» տվայտանքները․ պողպատե մանդատը թափահարելը վտանգավոր է

Խորհրդարանական արտահերթ ընտրություններով վերարտադրված իշխանությունը շարունակում է պնդել, թե ՀՀ քաղաքացիներից օրենքի և իրավունքի դիկտատուրա հաստատելու մանդատ են ստացել։ Երեկ էլ դատախազության աշխատողի օրվան նվիրված հանդիսավոր նիստում վարչապետի պաշտոնակատար Նիկոլ Փաշինյանն է հայտարարել այդ մանդատի մասին։ Վարչապետի պաշտոնակատարը կրկին տարփողել է, իբր 2018-ին ձևավորված իշխանությունը հրաժարվեց դատաիրավական համակարգի թելադրանքի քաղաքականությունից: Նա անդրադարձել է նաև ապօրինի գույքի բռնագանձման ինստիտուտին, որը Հայաստանի Հանրապետությունում նոր սկսել է գործել։ Փաշինյանը ասել է, թե այդտեղ էլ պիտի կարողանան արդարության ճանապարհներով քայլել, որպեսզի, այսպես ասած, վրեժխնդրության տրամաբանություն չգործի, այլ գործի օրինականության տրամաբանություն և ի վերջո արդարությունը հաստատվի, վերականգնվի ու պետության, ժողովրդի, հանրության շահերը լիարժեք վերականգնվեն:

Մինչդեռ մամուլում շրջանառվող տեղեկությունները հակառակն են վկայում։ Այդ օրենքը գործելու է բացառապես Փաշինյանի քաղաքական հակառակորդների դեմ։ Իսկ բոլոր նրանք, ովքեր իրենց հավատարմությունն են հայտնել գործող իշխանություններին, ոչ միայն ազատվում են պատասխանատվությունից և հետապնդումներից, այլև նոր արտոնություններ են ստանում Պաշտոնավարման երեք տարիների ընթացքում Փաշինյանի իշխանությունը, խախտելով իր տված բոլոր խոստումները, ամեն ինչ արել է դատաիրավական համակարգն իր վերահսկողության տակ վերցնելու համար։ Առայժմ նրան հաջողվել է միայն դատախազությունն ու քննչական մարմինները դարձնել քաղաքական հակառակորդների դեմ պատժիչ մահակ, իսկ դատավորների մի զգալի մասը հաջողությամբ դիմադրում է իշխանության ապօրինություններին։ Հետևաբար, օրենքի և իրավունքի դիկտատուրայի մասին Փաշինյանի ու նրա կողմնակիցների դատողությունները միայն դառը քմծիծաղ կարող են առաջացնել։

Սարգիս Բաբայան