Արևմուտքի ռևերանսները Փաշինյանին նոր աղետ են գուժում

Եվրամիությունը կարող է չեղարկել մուտքի սահմանափակումները Հայաստանի քաղաքացիների համար: ԵՄ նախագահությունն առաջարկել է Հայաստանը ներառել այն երկրների շարքում, որի քաղաքացիները կարող են զբոսաշրջության նպատակով այցելել շենգենյան գոտի, ինչպես նաև` Շվեյցարիա, Նորվեգիա, Իսլանդիա և Լիխտենշտեյն: Ակնկալվում է, որ այսօր այս հարցը քննարկման ու քվեարկության կդրվի ԵՄ դեսպանների նիստում և հանձնարարականի կատարումն, այնուամենայնիվ, թողնված է ԵՄ անդամ պետությունների հայեցողությանը:

Առաջին հայացքից բավական հաճելի և դրական ներկայացվող այս որոշումն իրականում թաքնված ենթաշերտեր ունի։ Պատերազմում պարտություն կրած և արտագաղթի տեմպերի աճ գրանցած երկրում նոր խնդիրներ է հարուցելու։ Արևմուտքն այսպիսի ռևերանսներով փորձում է մաքրել իր մեղքը պատերազմի ընթացքում Հայաստանին չաջակցելու, ագրեսոր պետություններինն չդատապարտելու, պատերազմը կանխելու գործում միջոցներ չձեռնարկելու համար։ Այս նախաձեռնությունը մեկ այլ ռիսկ էլ է պարունակում։

Ակտիվ և ուսյալ զանգվածի շրջանում ուժգնացել են արտագաղթելու միտումները, և շատերը հնարավորություն են փնտրում լքելու Հայաստանը։ Այսինքն, ԵՄ նման նախաձեռնությունը խթանելու է արտագաղթը։ Տուրիստական վիզայով Եվրոպայում հայտնվելով՝ շատերը չեն էլ վերադառնա հայրենիք։ Հեռացողները, բնականաբար, գործող իշխանության քննադատներն են, որոնք չեն կարողանում համակերպվել հայրենիքն այսպիսի ծանր վիճակի հասցնելու համար։ Հայաստանում մնալով՝ նրանք վտանգում են Նիկոլ Փաշինյանի իշխանությունը, իսկ հեռացողներն այլևս վտանգավոր չեն։ Ուստի պետք է մեծ վերապահումներով մոտենալ արևմտյան այս և հարանման նախաձեռնություններին, հասկանալ դրանց ենթատեքստերն ու իրական նպատակները։

Միքայել Կյուրեղյան