Վանաձորում 3 անձ սավանների օգնությամբ հոգեբուժարանից փախուստի է դիմել

NEWS.am-ը գրում է.

Լոռիում 3 անձ սավանների օգնությամբ հոգեբուժարանից փախուստի են դիմել:

Ոստիկանության մամուլի ծառայությունից NEWS.am-ին հայտնում են, որ մայիսի 31-ին, ժամը 04.30-ին, Լոռու մարզի հոգենյարդաբանական դիսպանսերից ոստիկանության Տարոնի բաժնում ահազանգ է ստացվել, որ ժամը 4-ի սահմաններում հոգեբուժարանում հարկադիր բուժում ստացող, 22-ամյա Գարեգին Պ.-ն /Լոռու մարզի ընդհանուր իրավասության առաջին ատյանի դատարանի 19.01.2016թ. դատավճռով ՀՀ քրեական օրենսգրքի 235 հոդվածի 4-րդ մաս, 34-177 հոդվածի 2-րդ մասի 3-րդ կետով, 177 հոդվածի 2-րդ մասի 3-րդ կետով նշանակվել է հարկադիր բուժում/, 19-ամյա Հովհաննես Ա.-ն /Լոռու մարզի ընդհանուր իրավասության առաջին ատյանի դատարանի 12.02.2016թ. դատավճռով ՀՀ քրեական օրենսգրքի 177 հոդվածի 2-րդ մասի 3-րդ կետով եւ 177 հոդվածի 3-րդ մասի 1.1 կետով նշանակվել է հարկադիր բուժում/ եւ 24-ամյա Մովսես Է.-ն /Լոռու մարզի ընդհանուր իրավասության առաջին ատյանի դատարանի 19.01.2016թ. դատավճռով ՀՀ քրեական օրենսգրքի 177 հոդվածի 3-րդ մասի 1.1 կետով նշանակվել է հարկադիր բուժում/ 3-րդ հարկի հիվանդասենյակի պատուհանից սավանները իրար կապելու միջոցով հոգեբուժարանից դիմել են փախուստի:

Ոստիկանության ծառայողների ձեռնարկած օպերատիվ-հետախուզական միջոցառումների շնորհիվ՝ նույն օրը Վանաձոր քաղաքի Գրիգոր Լուսավորչի փողոցի 32 շենքի մոտից բերման է ենթարկվել Գարեգին Պ.-ն, Բազում գյուղի 5-րդ փողոցի թիվ 47 հասցեից բերման է ենթարկվել Մովսես Է.-ն, իսկ Հովհաննես Ա.-ն բերման է ենթարկվել Երեւան քաղաքի Կասկադ համալիրի մոտից: