Բլոգեր Ռոման Բաղդասարյանը գործիք է դարձել Բաքվի ձեռքին
ՀԱՍԱՐԱԿՈՒԹՅՈՒՆ
infoteka24.ru-ն գրում է, որ հայ բլոգեր Ռոման Բաղդասարյանը կարծես թե մոռացել է, թե որ կողմից է ինքը` Հայաստանի՞, թե՞ Ադրբեջանի: YouTube-ի düzdanışaq ալիքը հրապարակել է երկու ժամ տևած հարցազրույցը Բաղդասարյանի և ԱՄՆ-ում բնակվող ադրբեջանցի «լրագրող» Իսմայիլ Ջալիլովի միջև:
Պատասխանելով հաղորդավարի հարցերին՝ Բաղդասարյանը, ինչպես ասում են, տնից դուրս է հանել ամբողջ կեղտոտ սպիտակեղենը: Ակնհայտ է, որ Հայաստանի իշխանություններին հաճոյանալու ձգտմամբ (իսկ Բաղդասարյանի համակրանքը նրանց հանդեպ հայտնի է)՝ բլոգերը 44-օրյա պատերազմում կրած պարտության համար մեղադրել է նախորդ իշխանություններին՝ Ռոբերտ Քոչարյանին և Սերժ Սարգսյանին: Չենք վիճի այդ փաստի հետ, քանի որ դրանում կա ճշմարտության հատիկ, բայց ներքին տարաձայնություններով ադրբեջանցիներին ուրախացնելը ոչ այլ ինչ է, քան դավաճանություն:
Բացի այդ, Բաղդասարյանը Արցախի ռազմական ղեկավարությանը մեղադրել է առաջնագծում տիրող իրավիճակի մասին ՀՀ ՊՆ-ին կեղծ տեղեկություններ տալու մեջ: Իր գրառումներում և ուղիղ հեռարձակումներում Բաղդասարյանը բազմիցս է ցեխ շպրտել Արցախի իշխանությունների և, այսպես կոչված, «ղարաբաղյան կլանի» (Քոչարյան, Սարգսյան) վրա:
Չնայած հայ ժողովրդին ավելի քան երբևէ պետք է միասնություն, այդպիսի բլոգերները և լրագրողները, ինչպիսին Բաղդասարյանն է, իրենց ոչ պրոֆեսիոնալ գործունեությամբ թշնամանք են սերմանում Հայաստանի և Արցախի հայերի մեջ: Բաղդասարյանն իր հայտարարություններով միայն ջուր է լցնում ադրբեջանական քարոզչության ջրաղացին, որը մեղադրում է Հայաստանի ղարաբաղյան առաջնորդներին Առաջին ղարաբաղյան պատերազմի ընթացքում իրենց պարտության ու ամոթի համար: Միևնույն ժամանակ, Ռոման Բաղդասարյանը բոլորովին չի մեղադրում Ադրբեջանին և նրա հանցավոր ղեկավարին Արցախի դեմ ագրեսիայի, խաղաղ բնակչության դեմ վայրագությունների, վարձկանների օգտագործման, հայոց նախնիների հողերի՝ Հադրութի և Շուշիի օկուպացիայի մեջ:
Միգուցե Բաղդասարյանը սպասարկում է որոշակի շրջանակների շահերը, որոնք ծայրաստիճան շահագրգռված են հայերի և ադրբեջանցիների միջև «խաղաղություն և վստահություն» հաստատելու մեջ: Սակայն յուրաքանչյուր հայ հիանալի հասկանում է, որ դա անհնար է, որ թշնամությունն ու ատելությունը երբեք չեն հաղթահարվի, քանի դեռ Ադրբեջանի իշխանությունները հայատացության իրենց ընթացքի մեջ են:
Առանձին կարելի է նշել Իսմայիլ Ջալիլովի կեղծավոր «ընկերասիրությունը»: Ցուցադրելով, իբր, անկեղծ և ազնիվ երկխոսության պատրաստակամություն, Ջալիլովը հավատարիմ է մնում ադրբեջանական քարոզչությանը: Նա Արցախը անվանում է Ադրբեջանի տարածք, խոսում է հայերի ինչ-որ վանդալիզմի մասին, երբ միայն պատերազմի օրերին համացանցում հրապարակվել են ադրբեջանցի օկուպանտների կողմից կատարված վանդալիզմի տասնյակ ապացույցներ:
Նյութը հրապարակման պատրաստեց Կամո Խաչիկյանը
