Պատժել անհնազանդ կուսակիցներին․ իշխանությունը դժգոհում է Հայկ Մարությանից
ՎԵՐԼՈՒԾՈՒԹՅՈՒՆՆԵՐ
Փաշինյանի թիմի քաղաքական հետապնդումները կարող են հասնել նաև իրենց թիմակիցներին։ «Քաղաքացիական պայմանագիրն» ու իր տխրահռչակ պարագլուխը վաղուց ապացուցել են, որ անձնական մանրախնդրության վարպետներ են և բոլոր միջոցներով կարող են վնասել այն անձանց, ովքեր համարձակվել են չաջակցել իրենց։ Ընտրություններից դեռ շատ առաջ մամուլը գրում էր, թե Երևանի քաղաքապետ Հայկ Մարությաննը դարձել է Փաշինյանի աչքի փուշը, քանի որ հրաժարվել է աջակցել «Քաղաքացիական պայմանագրի» քարոզարշավին, նաև ապօրինի հրահանգներ չի տվել իր ենթակայության տակ գործող հիմնարկներին՝ իշխանության օգտին կեղծիքներ անելու, կամ քարոզելու համար։ Բնական է՝ քաղաքապետի այս վարքագիծը պետք է արժանանար իշխանավորների վրեժխնդրությանը։ Փաշինյանի գլխավոր խորհրդական Արայիկ Հարությունյանը երեկ ափսոսանք է հայտնել, որ Հայկ Մարությանը նախընտրական փուլում ակներև և հրապարակային աջակցություն չհայտնեց «Քաղաքացիական պայմանագրին»:
«Ցավում եմ դրա համար, որովհետև այն քվեն, որով պարոն Մարությանը դարձել էր Երևանի քաղաքապետ, մեծամասամբ այն ուժինն է, որը ներկայումս արդեն երկրորդ անգամ ձևավորելու է կառավարություն»,- նշել է նա և հավելել, թե իրենց կուսակիցների շրջանում Հայկ Մարությանի նկատմամբ հստակ վերաբերմունք է ձևավորվել: Հարությունյանը չի բացառել, որ իրենք առաջիկայում քաղաքապետի մասով որոշումներ կկայացնեն, բայց այնպես կանեն, որ քաղաքն ու քաղաքային իշխանությունը չտուժեն։ Խնդիրը բոլորովին էլ Հայկ Մարությանի անձը չէ։ Մեծ վերապահումով կարելի է նշել, թե նա այս իշխանության ամենաարդյունավետ պաշտոնյաներից մեկն է։ Այս իշխանության թերացումներն ու հանցավոր բացթողումներն այնքան շատ են, որ դրական առումով որևէ մեկին առանձնացնելն այնքան էլ շնորհակալ գործ չէ։ Խնդիրը զուտ այս իշխանության մանրախնդրության մեջ է։
«Չես պաշտպանել, ապօրինություն չես արել մեզ համար, ուրեմն պիտի գնաս»,- ահա այս սկզբունքով է աշխատում Նիկոլ Փաշինյանի իշխանությունը։ Երևանի ավագանու մեծամասնությունը «Իմ քայլը» խմբակցությունն է, որի համար բարդություն չի ներկայացնում Հայկ Մարությանին անվստահություն հայտնելը։ Սակայն նման քայլը լուրջ վտանգներով է հղի։ Նախ, ավագանու 54 հոգանոց խմբակցությունն իր կազմում չունի համապատասխան թեկնածուի, որին կարող է Մարությանի փոխարեն ընտրել քաղաքապետ, իսկ դրսից ժամանակավոր պաշտոնակատար նշանակելու դեպքում ստիպված է լինելու վեց ամիս անց նոր ընտրություններ նշանակել։ Իսկ Երևանում Փաշինյանի նկատմամբ վերաբերմունքը կարող է հանգեցնել մայրաքաղաքում ընդդիմադիր իշխանության ձևավորման։ Եվ թեպետ ուզում են հեռացնել Մարությանին, սակայն չեն ուզում հընթացս կորցնել Երևանի քաղաքապետի պաշտոնը։ Ուստի արայիկհարությունյաններին առայժմ մնում է պատերի տակ կամ ԶԼՄ-ների տաղավարներում թափել իրենց սրտի հերսը, մինչև ի վիճակի լինեն հասկանալ, թե ինչպես են պատժելու անհնազանդ կուսակիցներին։
Սամվել Ցոլակյան
