Մասնագետը ներկայացրել է գլխուղեղի կաթվածի ու սրտամկանի ինֆարկտի կանխարգելման ամենապարզ միջոցը
ՀԱՍԱՐԱԿՈՒԹՅՈՒՆ
Սրտանոթային համակարգի հիվանդությունները համարվում են ամբողջ աշխարհում մարդկանց վաղաժամ մահվան հիմնական պատճառներից մեկը, ինչը պայմանավորված է նրանով, որ դրանք հաճախ ախտահարում են մարդու կարևորագույն օրգանները՝ սրտամկանն ու գլխուղեղը, և հազվադեպ են ախտորոշվում ժամանակին։ Բանն այն է, որ սրտանոթային հիվանդությունները ոչ միշտ են դրսևորվում վառ ախտանշաններով, ուստի հազվադեպ են ժամանակին հայտնաբերվում՝ ի վերջո հանգեցնելով սրտամկանի ինֆարկտի կամ գլխուղեղի կաթվածի: Նման խնդիրները կարող են ճակատագրական լինել՝ դառնալով մահվան կամ հաշմանդամության, ուստի դրանցից խուսափելու համար մասնագետները հորդորում են ժամանակին միջոցներ ձեռնարկել այս հիվանդությունների զարգացումը կանխելու և սրտանոթային համակարգի առողջությունը պահպանելու համար:
Ինչպես փոխանցում է lenta.ru կայքը, սրտաբան, բժշկական գիտությունների թեկնածու Աննա Կորենևիչն իր YouTube-յան ալիքում նշել է ամենապարզ ու արդյունավետ միջոցն այս հիվանդություններից ամենավտանգավորները՝ սրտամկանի ինֆարկտն ու գլխուղեղի կաթվածը կանխարգելելու համար: Մասնագետի խոսքով՝ նման լուրջ խանգարումներից խուսափելու համար պարզապես հարկավոր է ժամանակին բուժզննում անցնել ու խորհրդակցել սրտաբանի հետ՝ ներկայացնելով բուժզննման արդյունքները:
Ինչպես նշել է մասնագետը, անհրաժեշտ է կանոնավոր բժշկական զննում անցնել այս հիվանդության հիմնական պատճառներից մեկը՝ աթերոսկլերոզը ժամանակին հայտնաբերելու համար, ինչպես նաև մի շարք անալիցներ հանձնել, որից հետո հետազոտության արդյունքներն անպայման ցույց տալ սրտաբանին:
«Իսկապես, մեզ մոտ, ցավոք, աղետալի իրավիճակ է, և Երկիր մոլորակի բնակիչները հիմնական մահանում են սրտամկանի ինֆարկտներից և գլխուղեղի կաթվածներից: Նրանք մահանում են բացարձակ հանկարծակի և անսպասելիորեն կամ հիվանդանում են ու դառնում հաշմանդամ », - նշել է Կորենևիչը՝ միաժամանակ ընդգծելով, որ սրտի հիվանդությունների հայտնաբերման համար այս օրգանի ՄՌՏ (մագնիսառեզոնանսային շերտագրություն) հետազոտության կարիք իրականում չկա:
Այնուամենայնիվ հետազոտությունները պետք է ներառեն էխոսրտագրությունը հանգստի ժամանակ, էխոսրտագրությունը ծանրաբեռնվաածության ժամանակ, սրտամկանի, պարանոցի անոթների, ոտքերի զարկերակների, վահանձև գեղձի, երիկամների և լյարդի ուլտրաձայնային հետազոտությունները, հոլտերյան մոնիթորինգը (զարկերակային ճնշման գրանցում ամբողջ օրվա ընթացքում), արյան կլինիկական հետազոտությունը և մեզի ընդհանուր ու կենսաքիմիական հետազոտությունները:
Բժշկի խոսքով՝ վերոնշյալ հետազոտություններն առաջին հերթին պետք է անցնել 40 տարեկանից բարձր հիվանդները, ինչպես նաև այն մարդիկ, որոնք հաճախ են գանգատվում սրտամկանի հետ կապված խնդիրներից:
