Հաղթեց ատելության խոսքը․ նոր խորհրդարանում չեն լինի կոռեկտ քաղաքական ուժերը

Արտահերթ ընտրությունների արդյունքում նոր խորհրդարանում չեն լինի «Լուսավոր Հայաստան» և «Բարգավաճ Հայաստան» խմբակցությունները։ Մինչդեռ 2018թ․ ընտրությունների արդյունքում ԲՀԿ-ն ուներ 26, ԼՀԿ-ն՝ 18 պատգամավոր։ Նախընտրական ողջ ժամանակահատվածում այս երկու քաղաքական ուժերը զերծ մնացին ատելության խոսքի տարածումից, իրենց քարոզարշավը տարան կոռեկտ, ներկայացրեցին իրենց մոտեցումները երկիրը անդունդից հանելու և զարգացման հուն տեղափոխելու վերաբերյալ։ «Բարգավաճ Հայաստանը», իշխանությանը քննադատելիս էլ, չանցավ կոռեկտության սահմանները, իսկ կուսակցության առաջնորդ Գագիկ Ծառուկյանը հստակ ծրագիր էր ներկայացնում՝ տնտեսության վերականգնման ուղղությամբ։

«Լուսավոր Հայաստանի» պայծառ թիմը ևս գնաց իր երրորդ ճանապարհով՝ առանց հայհոյանքների ու վիրավորանքների, զուսպ քարոզարշավ իրականացրեց։ Պարզվեց, որ դա բավարար չէր Ազգային ժողովում հայտնվելու համար, հանրության մեծ մասին պատերազմում կրած խայտառակ պարտությունից հետո ավելի շատ հայհոյանք և ատելություն էր հարկավոր, ինչն էլ գեներացվեց իշխանության կողմից։ Ի վերջո, Նիկոլ Փաշինյանը խորհրդարանում մնաց միայնակ՝ նախկին երկու նախագահների թիմերի դեմ, իր իսկ ստեղծած ատելության մթնոլորտում, և ստիպված է լինելու անընդհատ հետ մղել ծանր հարվածները։ Իսկ կոռեկտ և դասական քաղաքական ուժերը ոչ թե կորցրեցին, այլ շահեցին։ Բռնցքամարտի ռինգի վերածված խորհրդարանը դժվար թե քաղաքական իմաստով որևէ բանի ընդունակ լինի, «Լուսավոր Հայաստանը», «Բարգավաճ Հայաստանը» և այլ արտախորհրդարանական քաղաքական ուժեր դրսում ավելի մեծ հնարավորություններ ունեն վերափոխվելու, վերափոխելու հանրությանը և հաջորդ ընտրություններին ավելի հաջող մասնակցելու։ Հատկապես, որ այս տեմպերով 8-րդ գումարման Ազգային ժողովը երկար ձգելու ռեսուրս չունի։

Բաբկեն Ներսիսյան