Վերջին մեխը դագաղին

Հայաստանում ավարտվեցին խորհրդարանական արտահերթ ընտրությունները։ Ավարտվեցին շոկային ելքով։ Պատերազմում խայտառակ պարտություն կրած ու նվաստացումներ ստացած ընտրողը նախընտրեց իր քվեն տալ երեք տարի շարունակ երկիրն ապականած, տնտեսությունն ու պետական համակարգը ջախջախած խորհրդարանական ուժին։ Նախնական տվյալների համաձայն՝ խորհրդարան են անցնում միայն երեք ուժեր։ «Քաղաքացիական պայմանագիրը» ստացել է 687.251 քվե կամ ընդհանուր ընտրողների 53.92 տոկոսը, ինչը թույլ կտա Նիկոլ Փաշինյանին կրկին սահմանադրական մեծամասնություն ունենալ խորհրդարանում։

Երկրորդ նախագահ Ռոբերտ Քոչարյանի գլխավորած «Հայաստան» դաշինքը ստացել է 268.165 քվե կամ ընդհանուր ընտրողների 21.01 տոկոսը, իսկ Սերժ Սարգսյանի և Արթուր Վանեցյանի «Պատիվ ունեմ» դաշինքը՝ 66.633 քվե կամ ընդհանուր ընտրողների 5.23 տոկոսը։ Խիստ նախնական գնահատումներով՝ Նիկոլ Փաշինյանը կունենա 71 մանդատ, Ռոբերտ Քոչարյանը՝ 27, իսկ Սերժ Սարգսյանը 7-8 մանդատ։ Մյուս քաղաքական ուժերը, հատկապես համերաշխության և խաղաղության կոչ անող քաղաքական միավորներն աննշան թվով քվեներ են ստացել։

7-րդ գումարման խորհրդարանն այլևս անցյալ է, իսկ 8-րդ գումարման խորհրդարանը սպառնում է դառնալ շատ ավելի վատը։ Հայաստանյան ընտրողը երկիրը անդունդից հանելու փոխարեն նախընտրեց վիրավորանքն ու ատելությունը, նվաստացումն ու անդունդը։ «Քաղաքացիական պայմանագիրը» կարող է տոնել իր պյուռոսյան հաղթանակը, դրա հետևանքները կրելու է մի ողջ պետություն։ Իսկ հայաստանյան քաղաքական ուժերը, մտածող ու արարող մարդիկ իսկապես մտածելու բան ունեն՝ ի՞նչն են սխալ արել, ի՞նչ է պետք անել ապագայում, և կան արդյո՞ք շանսեր ստեղծված իրավիճակը երբևէ կարգավորելու համար, իսկ պատերազմի խայտառակ ձախողման, կազմակերպչական բարդակի և գերագույն հրամանատարի հիստերիկ, ցայտնոտային վիճակի և բացարձակ անգիտության պատճառով տրված հազարավոր զոհերի հրեշային, ամոթալի էջը այլևս փակված է...փակված է ընտրողի, ոչ քաղաքացու ցանկությամ և որոշմամբ։

Տիգրան Առաքելյան