Իսկական սպան չի կարող ընդհանուր բան ունենալ Նիկոլ Փաշինյանի հետ

«Տարերային որոշումները, գործողությունների անվստահությունը, առաջնայինը երկրորդայինից տարբերելու անկարողությունը և Փաշինյանի քաղաքականության այլ սկզբունքներ ոչ մի ընդհանուր բան չունեն սպայի պատվի և արժանապատվության հետ»,- այս արձանագրումն արել է «Պատիվ ունեմ» դաշինքի ընտրացուցակը գլխավորող, Ազգային անվտանգության ծառայության նախկին տնօրեն Արթուր Վանեցյանը։

Մարդ, ով իշխանափոխությունից հետո նշանակվեց ամենակարևոր պաշտոններից մեկին և մեկուկես տարում տպավորիչ արդյունքներ ցուցադրելուց հետո ստիպված էր հրաժարական տալ ԱԱԾ պետի պաշտոնից և կոչ անել Փաշինյանին՝ «Կանգ ա՛ռ»։

«Հրաժարականի իմ դիմումին նախորդել էին աշխատանքի հարյուրավոր օրեր և պարզաբանումներ, բայց Նիկոլը շատ բան չէր լսում կամ չէր ցանկանում լսել, չէր հասկանում կամ չէր ցանկանում հասկանալ։ Ժամանակի ընթացքում նա սկսեց ավելի շատ ստել, խորամանկել, չհետևել պայմանավորվածություններին և էթիկային, ընկնում էր վերնագրերի, իրավիճակային որոշումների և մեկանգամյա էֆեկտի հետևից։ Չմտածելով երկրի ու ժողովրդի համար առանձին հետևանքների մասին»,- նշում է Վանեցյանը «Страна.ua» կայքին տված հարցազրույցում և հավելում․

«Եթե անկեղծ, դեռևս 2018թ. ես հույս ունեի, որ պոպուլիստ Փաշինյանին կարելի է ուղղել պետական և ստեղծարար հուն, բայց ժամանակի ընթացքում ակնհայտ դարձավ, որ այդ մարդն ունակ չէ երկրի առաջնորդ լինելու, որը վիթխարի քանակությամբ խնդիրներ ունի տնտեսությունում և անվտանգության ոլորտում»։

Այսօր էլ, երբ Հայաստանը Փաշինյանի իշխանության մեղքով խայտառակ պարտություն է կրել, հազարավոր զոհեր ունի, բանակն արնաքամ է եղել, իսկ պետական համակարգը ջախջախված է, իրեն հարգող որևէ սպա՝ ոստիկանության, ԱԱԾ-ի կամ Զինված ուժերի ծառայող, չի կարող ընդհանրություն ունենալ ապիկարների իշխանության հետ, ծառայել Նիկոլ Փաշինյանի ենթակայության տակ։ Շատերը համակարգից հեռացել են այս երեք տարում, մի քանիսն էլ քարոզարշավին են հրաժարվում կատարել Նիկոլ Փաշինյանի հանցավոր հրամանները։ Դա, սակայն, քիչ է, ուսադիրների պատիվը գնահատող և Հայրենիքին նվիրված զինվորականը առաջին պիտի ընդվզի և թույլ չտա երկրի կործանումը։

Ալեքսան Զաքարյան