Նիկոլ Փաշինյանը պատրաստվում է հետընտրական բախումներ հրահրել

Հայաստանի՝ առայժմ գործող իշխանությունները պատրաստվում են բախումներ հրահրել։ Կանխազգալով մոտալուտ պարտությունը՝ Փաշինյանը հայտ է ներկայացրել հունիսի 21-ից 24-ը Հանրապետության հրապարակում զանգվածային ակցիաներ իրականացնելու համար։ Սոցիալական բոլոր հարցումներով պարտվող իշխանականները գիտակցում են, թե ինչ հետևանքներ կունենա իրենց համար պարտությունն արտահերթ խորհրդարանական ընտրություններում, սակայն մտադիր են Հայաստանը վտանգելու գնով պահպանել իշխանությունը։ Դրան են միտված քարոզարշավի ողջ ընթացքում ընտրազանգվածին սադրելը, ահաբեկելը, նոր թիրախներ նախանշելը։ Միայն վերջին երկու օրում Փաշինյանը տարբեր հավաքներում սպառնացել է կադրային ջարդ և զանգվածային պաշտոնազրկումներ իրականացնել պետական համակարգում, «գիտական էլիտայից վռնդել» այն գիտնականներին, ովքեր «սխալ» քաղաքական հայացքներ ունեն։ Նախօրեին էլ Գեղարքունիքի մարզում հանրահավաքի ընթացքում իր կողմնակիցներին հունիսի 21-ին, հրավիրել է Երևանի Հանրապետության հրապարակ։

Քարոզարշավի վերջին շաբաթը ևս Փաշինյանն օգտագործելու է հոգեբանական տեռորի, մարդկանց նախկիններով ահաբեկելու, ուժային կառույցներում անհնազանդներին զսպելու գործողությունների համար։ Միանշանակ, այստեղ կարևոր է, թե ինչ կեցվածք կընդունեն ՀՀ ոստիկանությունն ու Ազգային անվտանգության ծառայությունը, թույլ կտա՞ն, որ կապիտուլյանտը երկիրը տանի անկայունության, ընդդհուպ քաղաքացիական պատերազմի, թե՞, ի վերջո, կկանխեն երկրի համար վատթարագույն զարգացումները։

Կարեն Առաքելյան