Ադրբեջանում կա 80 և ավելի չհաստատված գերի
ՔԱՂԱՔԱԿԱՆՈՒԹՅՈՒՆ
44-օրյա պատերազմից հետո նոյեմբերի 9-ին կնքված պայմանագրի համաձայն երկու կողմերը պարտավորվել էին վերադարձնել բոլոր գերիներին, սակայն ադրբեջանական կողմը մինչ օրս չի կատարել իր պարտավորությունները և պաշտոնական տվյալներով դեռ 75 հայ գերի ունենք Բաքվում։
Այս թեմայի վերաբերյալ զրուցել ենք Մարդու Իրավունքների Եվրոպական Դատարանում (ՄԻԵԴ) հայ գերիների շահերի ներկայացուցիչ Սիրանուշ Սահակյանի հետ՝ հասկանալու համար, թե իրականում քանի գերի կա Ադրբեջանում։
Հարիցն, թե իրականում որքան գերի է պահվում Ադրբեջանում՝ Սիրանում Սահակյանը պատասխանել է․«Այս պահին հաստատված գերիները 75-ն են, որոնց գերեվարված լինելը Ադրբեջան պետությունը հաստատել է: Կան անձինք, որոնց մասին Ադրբեջանը հրաժարվում է տեղեկություն տրամադրել՝ ասելով, որ նման անձինք իրենց զինված ուժերի կողմից չեն գերեվարվել և Ադրբեջանի հսկողության տակ ողջ չեն հայտնվել:Մենք ունենք անհերքելի ապացույցներ, որոնք գնահատվել ու համոզիչ են մեր միջազգային գործընկերների մոտ: Մենք խոսում ենք 75-ից բացի, մոտ 80-ից ավելի անձանց մասին, որոնք ողջ են եղել և որոնց ողջ վերադարձնելու ակնկալիքներ մենք ունենք: Ուստի, մեր ունեցած տեղեկություններով՝ 160-ից ավելի մարդիկ են պահվում Ադրբեջանում և պետք է հայրենադարձվեն:Ունենք նաև շուրջ 40 գործեր, որոնց ապացույցների համադրությունը խոսում է գերեվարված լինելու կանխավարկածի մասին և ավելին, դրանք չեն հերքվել Ադրբեջանի կողմից:Իրականում քանիսի՞ն կկարողանանք ողջ ստանալ. ես այս հարցի պատասխանը չեմ կարող տալ: Իմ դիրքորոշումն է, որ որևէ ժամ ավելի հայը չի կարող անվտանգ գտնվել ադրբեջանական հսկողության ներքո՝ մշտապես զուգակցվում են կյանքի հետ կապված սպառնալիքներ ներկայացնող գործողություններով, արտակարգ զարգացումների ռիսկերով: Արդեն իսկ բացահայտել ենք դեպքեր, երբ գերիները սպանվել են և մենք չենք կարող երաշխավորված ասել, որ դա չի սպառնում չհաստատված ողջ հայ գերիներին»։
Սոնա Գիշյան
