Բայդենի վարչակազմի անվճռականությունը վստահություն է ներշնչում Ալիևի ռեժիմին
ՔԱՂԱՔԱԿԱՆՈՒԹՅՈՒՆ
realtribune.ru-ն գրում է, որ Լեռնային Ղարաբաղում զինադադարից հետո Ադրբեջանի բռնապետ Իլհամ Ալիևը հասկացրել է, որ իր նպատակը Հայաստանի տարածքային նվաճումն է: Այս մասին գրել է Ամերիկյան ձեռներեցության ինստիտուտի վերլուծաբան Մայքլ Ռուբինը:
«Այն բանից հետո, երբ Բլինկենը հասկացրել է, որ Ադրբեջանը չի բախվի իր ագրեսիայի հետևանքներին և անգամ ֆինանսական պարգև կստանա, Ալիևը եկել է այն եզրակացության, որ կարող է իրագործել իր ծրագրերը: Արդյունքում 2021 թվականի մայիսի 12-ին ադրբեջանական զորքերը մի քանի կիլոմետրով անցել են Հայաստանի խորքերը, իսկ նրանց դուրս բերելու շուրջ համաձայնության գալու հետագա փորձերը անհաջողության են մատնվել», - ընդգծել է փորձագետը:
Ապրիլին ԱՄՆ-ի պետքարտուղար Էնթոնի Բլինկենը արտասահմանցի լրագրողների հետ առցանց հանդիպման ժամանակ ասել է, որ ԱՄՆ-ի նախագահ Ջո Բայդենը չի փորձել մեղքը բարդել Թուրքիայի վրա, երբ խոսել է Օսմանյան կայսրությունում հայերի ցեղասպանության մասին: Նրա խոսքով, Ամերիկայի առաջնորդը ներկայացրել է իր վաղեմի տեսակետը, երբ իր անունից Սպիտակ տանը հանդես է եկել գրավոր հայտարարությամբ, որտեղ ճանաչել է Օսմանյան կայսրությունում 20-րդ դարի սկզբին տեղի ունեցած Հայոց ցեղասպանությունը:
«Բլինկենի թիմը ակնհայտորեն համարում է, որ Հայոց ցեղասպանության ճանաչումը ոչ թե պատմական սխալի ուղղում է, այլ ավելի շուտ զիջում է Հայաստանին, որը պետք է կատարել փոխանակ վեճերը լուծելու համար: ԵԱՀԿ Մինսկի խմբի ձևաչափով դիվանագիտական ջանքերը խթանելու, վեճերը լուծելու, համակեցությունը խթանելու, մշակույթը պահպանելու և Հայաստանի ադրբեջանական և թուրքական շրջափակումը դադարեցնելու փոխարեն, Բլինկենը Ալիևին հասկացրել է, որ ինքը կարող է բառացիորեն խուսափել մարդասպանության մեղադրանքներից», - գրված է հոդվածում:
Ռուբինի կարծիքով, Բլինկենը կարող է իրեն խաղաղարար համարել, բայց Հարավային Կովկասում տեղի ունեցող իրադարձությունների բացասական հետևանքների անտեսումը հակառակ արդյունքն է տալիս:
Նյութը հրապարակման պատրաստեց Կամո Խաչիկյանը
