ԱԱԾ պետի նախկին պաշտոնակատարը Փաշինյանին ուղիղ մեղադրել է դավաճանության մեջ

Հայաստանի ԱԱԾ պետի նախկին ժամանակավոր պաշտոնակատարը Նիկոլ Փաշինյանին մեղադրել է պետական դավաճանության մեջ։ Պատերազմի ժամանակ ԱԱԾ պետի պարտականությունները կատարող, գնդապետ Միքայել Համբարձումյանը հարցազրույց է տվել «Արմնյուզ» հեռուստաընկերության «#ՕրաԽնդիր» հաղորդմանը և ուշագրավ բացահայտումներ է արել։ Համբարձումյանը նշել է, թե չի եղել մի իրավիճակ, որը հաջողություն էր խոստանում։

«Իրավիճակը գնալով վատանում էր, մենք դա տեսնում էինք և զեկուցում էինք երկրի ղեկավարությանը։ Մենք ասում էինք, որ Հայաստանը շանս չունի, աշխարհը մեզ անտարբերության էր մատնել, իսկ ռազմական ներուժը սպառված էր։ Միակ պաշտոնատար անձը, որն իրավասու էր գործողությունները կանգնեցնելու, դա Նիկոլ Փաշինյանն էր, ով դա չի արել»,- նշել է պահեստազորի գնդապետը։

Նա նաև հայտնել է, թե Նիկոլ Փաշինյանը հոկտեմբերի 20-ի ԱԽ նիստում չի տեղեկացրել, որ ՌԴ նախագահից պատերազմը կանգնեցնելու առաջարկ է ստացել՝ չնայած և՛ Օնիկ Գասպարյանը, և՛ Դավիթ Տոնոյանը նիստի ընթացքում մանրամասն զեկուցել են, որ շանս չունենք, պարտվում ենք։ Թեպետ, եթե վարչապետն ընդուներ պատերազմը կանգնեցնելու առաջարկը հազարավոր զոհեր չէինք ունենա, իսկ Հադրութն ու Շուշին կմնային հայկական:

«Եթե մենք խոսում ենք միտումնավորության մասին, դա պետական դավաճանություն է։ Պատերազմում պարտվել ենք ապիկարության, անշնորհքության, վատ կազմակերպվածության պատճառով»,- ասել է պահեստազորի գնդապետը:

Ըստ էության, ԱԱԾ պատերազմական շրջանի տնօրենը վարչապետին ուղիղ մեղադրում է պետական դավաճանության, անկազմակերպվածության, փնթիության, պատերազմը ժամանակին չկանգնեցնելու մեջ։ Հեռու ենք կարծելուց, թե այս փաստարկները որևէ կերպ կարող են ազդել փաշինյանական ժեխի գիտակցության վրա։ Որևէ ապացույց նրանց չի հետաքրքրում, ո՛չ պարտությունը, ո՛չ գերիների խնդիրը, ո՛չ էլ պատերազմի ժամանակ ու դրանից հետո գործող իշխանությունների վարքը։ Այդուհանդերձ, հուսով ենք, որ իրատես մարդիկ ի վերջո կգիտակցեն՝ այս ապիկարների իշխանության վերարտադրությունը Հայաստանը տանում է վերջնականապես պետականությունից և ինքնիշխանությունից զրկելու ճանապարհով։

Արմեն Մեսրոպյան