Մենք պետք է ինքներս փորձենք մեր անվտանգությունն ինչ-որ չափով երաշխավորող քայլեր անել
ՔԱՂԱՔԱԿԱՆՈՒԹՅՈՒՆ
Նիկոլ Փաշինյանը երեկ ԱԽ նիստում միջազգային հանրությանն ու Ադրբեջանի իշխանություններին ուղղված առաջարկ էր արել՝ սահմանին տեղակայել միջազգային դիտորդներ: Այս թեմայով զրուցել ենք քաղաքագետ, «Ժողովրդավարական համախմբում» կուսակցության նախագահ Սուրեն Պետրոսյանի հետ։
Հարցին, թե վարչապետի պաշտոնակատարի կողմից արված առաջարկը որքանո՞վ է իրատեսական` քաղաքագետը պատասխանել է․ «Եթե այս առաջարկը լիներ մոտավորապես 2 տարի առաջ, մենք դա ինչ-որ տեղ կարող էինք պատկերացնել, սակայն հիմա մի իրավիճակ է, որ մեր հողի վրա այս պահին ռուս խաղաղապահներն են ու եթե մենք դիմենք ԵՄ-ին, ԵԱՀԿ-ին կամ ԱՄՆ-ին ու երկուստեք մեծ ցանկություն լինի այդ առաջարկն իրագործելու, ըստ իս, դա չի հաջողվելու ու նման քայլով ավելին ենք խորացնելու ճգնաժամը։ Մենք պետք է ինքներս փորձենք մեր անվտանգությունն ինչ-որ չափով երաշխավորող քայլեր անել, հետո նաև փորձենք այլ տրամաբանությամբ մեր անվտանգությունը երաշխավորել Ռուսաստանի հետ»։
Անդրադառնալով այն հարցին, թե ՀՀ պետական սահմանին միջազգային դիտորդների տեղակայումն ինչիպիսի՞ վտանգների կարող են առաջացնել մեր իսկ պետության համար, Սուրեն Պետրոսյանը պատասխանել է․ «Մեր առաջին ու հիմնական սպառնալիքը սեփական իշխանությունն է։ Մենք չենք կարողանում հասկանալ, թե իրականում ի՞նչ ենք ուզում։ Ինձ համար խիստ անհասկանալի է, թե մենք ինչպե՞ս ենք հաջողում եղած ամբողջ քարտեզների ցանկից մշտապես ընտրել ու վեր հանել ամենաադրբեջանամետ կամ Ադրբեջանի շահը սպասարկող քարտեզներ։ ԽՍՀՄ-ի ժամանակ եղել են բազմաթիվ քարտեզներ, բայց մենք դրանց միջից ընտրում ենք ամենահակահայ քարտեզները և փորձում ենք դրանք իրականացնել ու տեսնում ենք, թե ինչ տրամաբանությամբ ենք դա ուզում անել։ Եթե մենք չենք կարողանում գեներացնել մեր պետական շահը, հետևաբար չենք կարող մեր շահերը գեներացնելու նպատակով համագործակցել այլ պետությունների հետ»։
Սոնա Գիշյան
