Ուղղակի մաքսայինին ասվել է՝ եթե մի կլետկա ձու մտավ Հայաստան, մի տեղդ պոկելու եմ. Ռոբերտ Քոչարյան
ՔԱՂԱՔԱԿԱՆՈՒԹՅՈՒՆԻնձ համար գերխնդիր էր աշխատատեղեր ստեղծելը, որովհետեւ իմ նախընտրական արշավը եղել է աշխատատեղերի վերաբերյալ հանդիպում մեր բնակչության հետ: Այս մասին, այսօր՝ մայիսի 25-ին, բիզնեսի, ՓՄՁ և շինարարության ոլորտի ներկայացուցիչների հետ հանդիպման ժամանակ նշել է ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը:
«Մարդիկ գործ չունեին գործ չունենալը տղամարդու համար դեգրադացման պես մի բան է: Նաեւ ընտանիքի ինստիտուտն էևր քայքայվում, որովհետեւ տունը պահող պետք է լինի, վաստակող պետք է լինի: Հարգանքը նաեւ դրանից է գալիս, ոչ թե ճակատին գրած է տղամարդ, միայն դա է: Մենք քննարկել ենք, թե տվյալ ոլորտում ինչքան է ներմուծվում, ինչ է ներմուծվում, որը կարող ենք նաեւ մենք արտադրել: Ցանկը տվել են, որից ամենամեծը եղել է սկզբից ձվի արտադրությունը, հետո թռչնամսի արտադրությունը: Հանդիպել եմ ոլորտի գործարարների հետ, ասել ենք, ինչ հարցեր ունեք, եթե այդ հարցերը լուծում ենք, մենք ինչքան ժամանակում կարող ենք ամբողջությամբ ներմուծումը փոխարինել տեղական արտադրությամբ: Ինձ ժամկետ են ասել՝ 1,5 տարի:
Ու պայմանանավորվում էինք՝ եթե հանկարծ ես իմ մասով խոստացածն անում եմ, իսկ նրանք իրենցը՝ չեն անում, թող ինձնից չնեղանան։ Բոլորն իրենց մասը փայլուն արել են: Խնդիրները լուծվում էին նաև հարկային և մաքսային վարչարարության բարեփոխման արդյունքում: Ուղղակի մաքսայինին ասվել է՝ եթե մի կլետկա ձու մտավ Հայաստան, մի տեղդ պոկելու եմ»,-ասաց Քոչարյանը:
Նրա խոսքով, որպեսզի ներսում դեֆիցիտ չստեղծվի, մեկ տարվա ընթացքում ասվել է, որ մեկ տարվա ընթացքում արտադրությունը պետք է քանակն ավելացնի, ներմուծումը պակասի:
Քոչարյանը խոստովանեց, որ կառավարության կողմից այդպիսի քաղաքականություն վարելը ճիշտ չէ, բայց այն ժամանակ այնքան վատ վիճակում էր երկիրը, որ այդ քայլերով շատ ոլորտներ խելքի են բերել, իսկ արդեն 2003-2004 թվականից հետո այդպիսի բաներ չեն արել:
«Ոսկերչության ոլորտը նույն ձեւի ենք արել: Ես էմիլին գտել եմ Մոսկվայում, գործարանը փակ էր: Կանչել եմ ասել եմ՝ ինչքան ժամանակ է պետք, որ գործարանդ աշխատի: Ասեց՝ բա, բա: Ասացի՝ բա-բա չգիտեմ, ի՞նչ է պետք: Ժամկետը դրել ենք, գործարանը աշխատեց»,-ասաց նա՝ հավելելով, որ մեկ-մեկ բռունցքը սեղանին խփելն օգնում է:
«Ինձ համար հասկանալի չէ, թե ինչու պետք է լոլիկ մտնի Հայաստան այսօր Թուրքիայից: Ինձ ասում են՝ շրջանցելով գալիս է: Հիմա նայեք մեր սուբսիդավորման ծավալները եւ Թուրքիայում սուբսիդավորման ծավալները: Խի՞ ենք գյուղացուն դնում հիմար վիճակում: Չպետք է դա անենք: Ես կարծում եմ՝ ներմուծողները որոշակի ազդեցություն ունեն կառավարության վրա, եթե այս հարցի լուծումը չեն տալիս: Այն ժամանակ էլ այդ ազդեցությունը կար, բայց երբ նժարին դնում ես սեփական արտադրություն, աշխատատեղեր, երկրի ՀՆԱ-ն, իհարկե, այստեղ պարզ էր, թե ինչ պետք է անել»,-ասաց Քոչարյանը:
