Հանճարների գյուղը. հայկական գյուղը կարող է դառնալ «սիլիկոնյան հովտի» նմանակ
ՀԱՍԱՐԱԿՈՒԹՅՈՒՆ
mir24.tv-ն գրում է, որ Քանաքեռավան գյուղը կարող է դառնալ հայկական «Սիլիկոնային հովիտ»: Երևանից ՏՏ ընկերություններն արդեն տեղափոխվում են այնտեղ, իսկ տեղի փողոցները անվանում են հայտնի ֆիզիկոսների, մաթեմատիկոսների և աստղագետների անուններով: Ներկայումս Քանաքեռավանում հատկապես ուշադիր են ուսումնասիրվում գիտնականների, մաթեմատիկոսների և աստղագետների կենսագրությունները: մարդիկ ուզում են ամեն ինչ իմանալ նրանց մասին, ում անուններով են կոչվում փողոցները, ասել է տեղի միակ դպրոցի ֆիզիկայի ուսուցիչ Մանվել Ալեքսանյանը:
«Դպրոցականները համացանցում փնտրում են այն գիտնականների անունները, որոնց անունով կոչվել են մեր փողոցները: Նրանք գալիս են ինձ մոտ և պատմում իրենց հայտնագործությունների մասին, հարցնում են, թե արդյո՞ք նրանք այլ նվաճումներ ունեն: Եվ ես խոսում եմ այդ մարդկանց այլ արժանիքների մասին: Տնից դպրոց գնալիս ես քայլում եմ չորս փողոցներով, որոնք կոչվում են մեծ գիտնականների անուններով, և դա ինձ համար մեծ հաճույք է», - պատմել է ուսուցիչը:
«Ես ապրում եմ ֆրանսիացի ֆիզիկոս և աստղագետ Լեոն Ֆուկոյի անունով փողոցում: Ես շատ բան գիտեմ նրա և նրա գյուտերի մասին: Նա ստեղծել է մի մեխանիզմ, որը կոչվում էր «Ֆուկոյի ճոճանակ», որը ցույց էր տալիս երկրի պտույտը իր առանցքի շուրջը», - պատմել է 11-րդ դասարանի աշակերտ Էդիտա Քամալյանը: «Ես ապրում եմ Նիկոլա Տեսլայի փողոցում: Երբ ես սկսեցի ուսումնասիրել նրա կյանքը, գտա շատ հետաքրքիր մանրամասներ: Իհարկե, ես դա պատմեցի իմ ընկերներին: Շատ հետաքրքիր է», - ասել է 10-րդ դասարանի աշակերտուհի Մելինե Ենոքյանը:
Քանաքեռավանը Երևանից 20 րոպե հեռավորության վրա է: Տեղական վարչակազմը կանգ չի առել փողոցները վերանվանելու մեջ: Նրանց արդեն հաջողվել է «հրապուրել» երեք ՏՏ ընկերությունների, որոնք իրենց գրասենյակները տեղափոխել են գյուղ:
«Երևանում մենք խնդիր ունեինք. ստիպված էինք ընդլայնել, բայց հարմար տարածքներ չկային: Եվ երբ մենք հայտնաբերեցինք Քանաքեռավանը, որը մայրաքաղաքին և մոտ է, և միևնույն ժամանակ զգացողություն կա, որ դու քաղաքից դուրս ես: Մենք կարողացանք այստեղ արտադրությունն ընդլայնել: Մեր աշխատակիցները հիմնականում գալիս են Երևանից, բայց շուտով իմ երկու գործընկերները կտեղափոխվեն այստեղ ապրելու», - ասել է ինժեներ Գևորգ Փարսյանը:
Տեղի բնակիչները հույս ունեն, որ իրենց գյուղը կարող է հետաքրքրել նաև զբոսաշրջիկներին, ովքեր, որպես կանոն, գծում են իրենց երթուղիները շրջանցելով Քանաքեռավանուն: Նրանք նախատեսում են վերանվանված փողոցները զարդարել հատուկ օբյեկտներով:
«Յուրաքանչյուր փողոցում, իր անվանմանը համապատասխան, մենք նախատեսում ենք տեղադրել գիտնականի գյուտի խորհրդանիշ: Օրինակ, Նիկոլա Տեսլա փողոցում կլինի «Տեսլա գնդակ», - ասել է գյուղապետարանի առաջատար մասնագետ Անահիտ Սաֆարյանը:
Գյուղական համայնքում բնակվում է շուրջ 4 հազար մարդ: Քանաքեռավանցիները հիմնականում զբաղվում են անասնապահությամբ և մեղվաբուծությամբ: Եվ հիմա նրանք երազում են, որ շուտով իրենց հայրենի գյուղը վերածվի Հայաստանի գիտական մայրաքաղաքի:
Նյութը հրապարակման պատրաստեց Կամո Խաչիկյանը
