«Պարո՛ն Բայդեն, Դուք կանգնեցիք հայերի կողքին, հիմա էլ ձեր արյունոտ ձեռքերով այլ պատմություն եք գրում». Էրդողան

Թուրքիայի նախագահ Ռեջեփ Թայիփ Էրդողանը դատապարտել է իսրայելա-պաղեստինյան հակամարտությունում իսրայելական կողմին ԱՄՆ-ի աջակցությունը: Այս մասին տեղեկանում ենք Yeni şafak պարբերականից:

«Պարո՛ն Բայդեն, Դուք կանգնեցիք հայերի կողքին, այսպես ասած, Հայոց ցեղասպանության հարցում: Հիմա, ցավոք, ձեր արյունոտ ձեռքերով գրում եք այս միջադեպի պատմությունը, որը մեծ վնասներ է հասցրել Գազային և հարյուր հազարավոր մարդկանց մահվան պատճառ դարձել»,-հայտարարել է Էրդողանը:

Թուրքիայի նախագահն իր դժգոհությունն է հայտնել այն կապակցությամբ, որ ԱՄՆ-ն զենք է վաճառում Իսրայելին: «Այսօր մենք տեսանք Իսրայելին զենք վաճառելու հարցում Բայդենի ստորագրությունը»,- հավելել է Թուրքիայի նախագահը:

Պաղեստինցիների և իսրայելցիների միջև անցյալ շաբաթ սկսված բախումների հետևանքով պաղեստինյան կողմում զոհերի թիվը հասել է 212-ի, որոնցից 61-ը երեխա և 34-ը կին, վիրավորվել է մոտ 1500 պաղեստինցի, իսկ իսրայելական կողմում զոհերի թիվը 10-ն է, այդ թվում՝ 2 երեխա։

Երուսաղեմում հուզումները սկսվել են մայիսի 7-ին: Արաբ երիտասարդների և ոստիկանության միջև բախումները բռնկվել են մայիսի 8-ի երեկոյան, այնուհետև շարունակվել՝ տարածվելով Տաճարի լեռան և Ալ-Աքսա մզկիթի տարածքում: Դրանք իրենց գագաթնակետին հասել են մայիսի 10-ին, երբ հրեաները նշում են Երուսաղեմի օրը: Բախումների ընթացքում կան զոհեր և վիրավորներ, այդ թվում՝ խաղաղ բնակչության շրջանում: Իսրայելի բանակը հայտարարել Է, որ ոչնչացրել Է ՀԱՄԱՍ-ի հետախուզության հանգուցային դեմքերի, այդ թվում՝ ՀԱՄԱՍ-ի ռազմական հետախուզության անվտանգության բաժնի ղեկավարին ու նրա տեղակալին: