Զելենսկիի կարծիքով` սեպտեմբերին ՌԴ-ի կողմից հարձակում չի լինի, քանի որ դա կարող է համաշխարհային պատերազմի հանգեցնել
ՄԻՋԱԶԳԱՅԻՆ
Ուկրաինայի նախագահ Վլադիմիր Զելենսկին կարծում է, որ սեպտեմբերին Ռուսաստանի կողմից Ուկրաինայի վրա հարձակում չի լինի, քանի որ այդպիսով համաշխարհային պատերազմի սպառնալիք կառաջանա, հայտնում է EurAsia Daily լրատվական կայքը:
Այս մասին Զելենսկին հայտարարել է պետական անվտանգությանն առնչվող «Ուկրաինա 30» շարքի համաժողովի ընթացքում: Ի պատասխան լրագրողների հարցին այն մասին, թե արդյո՞ք Ուկրաինան պատրաստ է Ռուսաստանի կողմից հնարավոր հարձակմանը, որը, ըստ փորձագետների, կլինի սեպտեմբերին, Զելենսկին ասել է, որ Ուկրաինան շատ հզոր զինվորներ ունեցող երկիր է:
«Պատրա՞ստ ենք, աշխարհը պատրա՞ստ է, Եվրոպան պատրա՞ստ է լայնամասշտաբ պատերազմի: Կարծում եմ, որ ոչ ոք առհասարակ պատրաստ չէ: Կարծում եմ, որ Ռուսաստանը չի գնա նման քայլի, քանի որ դա կարող է համաշխարհային պատերազմ լինել», - նշել է Զելենսկին:
Զելենսկիի կարծիքով` Ռուսաստանի կողմից «լայնամասշտաբ ներխուժման» հավանականությունը եղել է, սակայն Կիևի քաղաքական ջանքերի և ուկրաինական «հզոր» բանակի շնորհիվ «սրացումն արդեն կասեցվել է»: Նա նշել է, որ հնարավոր հարձակման դեպքում իրավիճակը շատ վտանգավոր կլինի, սակայն վախենալու բան չկա, քանի որ իրենք իրենց հողի վրա են և պաշտպանում են այն:
