Մասնագետը ներկայացրել է զարկերակային ճնշումն առանց դեղորայքի կարգավորելու ամենապարզ միջոցը

Զարկերակային բարձր ճնշումը շատ տարածված խնդիր է, որը համարվում է սրտի նոպաների, գլխուղեղի կաթվածի, անոթալայնանքի, կոգնիտիվ գործառույթների թուլացման ու երիկամային անբավարարության զարգացմանը նպաստող հիմնական գործոններից մեկը։ Այս հիվանդության դեպքում սովորաբար նշանակվում են զարկերակային ճնշումը կարգավորող դեղամիջոցներ, սակայն դրանք կարող են հանգեցնել մի շարք կողմնակի բարդությունների, այդ թվում՝ անքնության, ոտքերի ջղաձգումների, գլխապտույտների և այլն։ 

Նման տհաճ բարդություններից խուսափելու համար մասնագետները խորհուրդ են տալիս փորձել կարգավորել զարկերակային ճնշումն առանց դեղորայքի և կանխել հետագա տատանումները, ինչը թույլ կտա խուսափել և՛ դեղամիջոցների, և՛ զարկերակային բարձր ճնշման վնասակար ազդեցությունից։

Ռուս բժիշկ Տատյանա Ռոմանենկոն m24.ru-ի հետ զրույցում ներկայացրել է ճնշման ցուցանիշներն առանց դեղորայքի կարգավորելու ամենապարզ միջոցներից մեկը՝ շեշտելով, որ մինչև 140/90 մմ/սս ցուցանիշին հասնելը (զարկերակային գերճնշման առաջին փուլ) զարկերակային ճնշումը կարելի է հեշտությամբ կարգավորել բնական ճանապարհով։

Մասնագետի խոսքով՝ արյան ճնշման կարգավորման և հետագա տատանումների կանխարգելման համար հարկավոր է առաջին հերթին կարգավորել քաշը, կարգավորել սննդակարգը, սահմանափակել աղի գործածությունը, կարգավորել օրվա ռեժիմն ու ապահովել բավարար հանգիստ։

Բացի այդ, բժիշկը շեշտում է, որ ճնշման նվազեցման համար հարկավոր է որոշակի մակարդակի ֆիզիկական ակտիվություն ցուցաբերել։ Ընդ որում՝ հատկապես կարևոր են անաերոբային վարժություններն ու քայլքը։ Մասնագետի խոսքով՝ այս պարզ միջոցների ձեռնարկումը կարող է շատ արդյունավետ լինել զարկերակային ճնշման կարգավորման հարցում, սակայն եթե անգամ այս միջոցների ձեռնարկումը չի օգնում կարգավորել ճնշումը, ապա հարկավոր է դիմել մասնագետին՝ դեղորայքային բուժման նշանակման համար։