«Գնալու տեղ դեռ կա»․ ինչի՞ կբերի Փաշինյանի հրաժարականը
ՔԱՂԱՔԱԿԱՆՈՒԹՅՈՒՆ
vm.ru-ն գրում է, որ չնայած այն հանգամանքին, որ Հայաստանի վարչապետը հայտարարել է իր հրաժարականի մասին, որը ստորագրել է Հայաստանի նախագահ Արմեն Սարգսյանը, մինչև ընտրությունները, Փաշինյանը կշարունակի ղեկավարել կառավարությունը` որպես վարչապետի պաշտոնակատար:
Ըստ Տարածաշրջանային խնդիրների ինստիտուտի գլխավոր տնօրեն Դմիտրի Ժուրավլևի` փաստացի, իր որոշմամբ, չնայած դա վաղուց պլանավորված էր, Փաշինյանը հարուցել է խորհրդարանական ճգնաժամ: Խորհրդարանականից բացի Հայաստանում շարունակվում է պատերազմում կրած պարտության հետ կապված քաղաքական ճգնաժամը, որի համար տեղական էլիտաները, ի միջի այլոց, մեղադրում են գործող վարչապետին: Ըստ փորձագետի` այնուամենայնիվ, նա հաղթելու շանս ունի, չնայած ոչ հարյուր տոկոսով:
«Փաշինյանի հաղթանակի հավանականությունը, ամենայն հավանականությամբ, 50-50 է: Անհասկանալի է, թե ինչպես է վերաբերվում նրան Հայաստանի հասարակ բնակչությունը: Նա էլիտաների աջակցությունը չի ստանա: Փաստն այն է, որ առանցքային նախարարները, երկրի նախագահները, զինված ուժերի ղեկավարները, այս կամ այն կերպ, Ղարաբաղի առաջին պատերազմի մասնակիցներ են, որում հաղթել էր Հայաստանը: Փաշինյանը եկել է իշխանության, բացառել է նոր բախման հավանականությունը և կոչ արել մարդկանց մտածել սոցիալ-տնտեսական զարգացման մասին: Հետևաբար, ժողովուրդն է սատարել նրան, ոչ թե էլիտան: Բայց հետո եղել է պարտված պատերազմ», - բացատրել է քաղաքագետը:
Ժուրավլևը նշել է, որ Ղարաբաղյան երկրորդ պատերազմի պատճառով կան փախստականներ և զոհեր, տուժել է հասարակ մարդկանց ահռելի քանակ: Արտաքին քաղաքականության ձախողմանը հաջորդել է բնակչության սոցիալական վիճակի վատթարացումը, և Փաշինյանը սկսել է խնդիրներ ունենալ իր ընտրողների հետ:
«Նիկոլ Փաշինյանը լավն է, երբ արտաքին քաղաքականության մեջ ամեն ինչ նորմալ է, երբ պետք է այդ լավ արտաքին քաղաքականությանը մի կտոր կարագ ավելացնել: Բայց պարզվել է, որ կարագ կամ ընդհանրապես չի եղել, կամ էլ եղել է շատ քիչ: Նա նաև չի կարողացել համաձայնության գալ ժողովրդի հետ: Եթե միայն պետությունը կորցրած լիներ՝ նորից ոչինչ, բայց այստեղ կոնկրետ մարդիկ են կորուստներ ունեցել: Իհարկե, նա կարող էր նստել իր աթոռին մինչև իր սահմանադրական լիազորությունների ավարտը, բայց փաստ չէ, որ դա նրան ավելի լավը կդարձներ: Ընդհանուր առմամբ, արտահերթ ընտրությունները միշտ էլ ձեռնտու են գործող կառավարությանը, ընդդիմությունը պատրաստ չէ դրանց», - ավելացրել է Ժուրավլևը:
Քաղաքագետ, հրապարակախոս Արմեն Գասպարյանը նույնպես կարծում է, որ Հայաստանի վարչապետը հաղթելու շանս ունի: Մարդկանց փոքրամասնություն է մասնակցում նրա դեմ բողոքի ցույցերին և ազգային նվաստացմանը: Մնացածը, ըստ փորձագետի, կարծես թե գոհ են ամեն ինչից:
«Ինձ ընդհանրապես չի զարմացնի, եթե նրանք շարունակեն նույն ոգով (վերընտրեն կառավարության ներկայիս ղեկավարին): Ընկնելու տեղ դեռ կա, և ընկեր Փաշինյանը ամեն ինչ կտանի իր տրամաբանական ավարտին: Անօգուտ է մարդկանց բացատրել, որ բլոգերը չի կարող երկիր ղեկավարել: Փաշինյանն, ընդհանուր առմամբ, միջակ լրագրող է եղել: Այն, ինչ նա անում է, անվերջ ուղիղ հեռարձակումներն են Facebook- ում», - նշել է զրուցակիցը: Այնուամենայնիվ, քաղաքագետը հույս է հայտնել, որ ողջախոհությունը կհաղթի Հայաստանում: «Օրինակ՝ Ռոբերտ Քոչարյանը կվերադառնա: Ես այնտեղ այլ անձնավորությունների չեմ տեսնում, ովքեր կարող են ամեն ինչ շտկել», - ասել է Գասպարյանը: Նրա խոսքով՝ իրական փոփոխությունների համար Հայաստանը պետք է դասեր քաղի Լեռնային Ղարաբաղում տեղի ունեցած պարտությունից: Եվ ցանկալի է դա անել հնարավորինս շուտ», - եզրափակել է նա:
Նյութը հրապարակման պատրաստեց Կամո Խաչիկյանը
