Ըմպելիքներ, որոնք խանգարում են դեղորայքին

Blognews.am-ը գրում է.

Առողջության համար երբեմն շատ վտանգավոր է որոշ ըմպելիքները խառնել դեղորայքի հետ:
Անհրաժեշտ է զգույշ լինել, և երբ դեղն ընդունելիս վերցնում եք առաջին իսկ պատահած ըմպելիքը, իմացեք, որ դրանցից շատերը կարող են նվազեցնել դեղերի արդյունավետությունը և առողջական խնդիրներ առաջացնել:

Բժիշկ-թունաբան Լեսլի Դայը մատնանշում է ամենատարածված անցանկալի համադրությունները:

Գրեյպֆրուտի հյութ

Գրեյպֆրուտի հյութը բացասաբար է ազդում ավելի քան 50 դեղորայքի վրա, այդ թվում նաև՝ ստատինների: Եվ քանի որ այդ ազդեցությունը տևում է ավելի քան 24 ժամ, հետևաբար չի կարելի դեղորայքը ընդունելուց հետո որոշ ժամանակ անց այն խմել:

Նռան հյութ
Նուռը պարունակում է ֆերմենտ, որը քայքայում է արյան ճնշումը կարգավորող որոշ դեղամիջոցների հատկությունները:

Կաթ, սոյայի կաթ և կաթի հիման վրա պատրաստվող կոկտեյլ

Կալցիումը կարող է խանգարել վահանաձև գեղձի հորմոնների համար նախատեսված դեղամիջոցների աշխատանքին: Մինչ կալցիումով հարուստ ըմպելիք ըմպելը անհրաժեշտ է առնվազն 4 ժամ սպասել:

Կոֆեինով խմիչքներ (սուրճ, կանաչ թեյ և էներգետիկ ըմպելիք)

Կոֆեին պարունակող ըմպելիքների և խթանիչների միաժամանակյա ընդունումը առողջության համար լուրջ վտանգ է հանդիսանում: 

Սպորտային ըմպելիքներ

Մարզական խմիչքները պարունակում են կալիում, որը չի կարելի համատեղել սրտի անբավարարությունը  և հիպերտոնիան բուժող որոշ դեղորայքի հետ: Բացի այդ՝ շատ կալիում կա նաև բանանի մեջ:

Գինի և էներգետիկ ըմպելիքներ

Հակադեպրեսիոն դեղամիջոցներ օգտագործելիս հրաժարվեք մեկ գավաթ գինուց. դրանց համադրությունը կարող է արյան բարձր ճնշման, գլխացավերի, ինսուլտի և սրտի արագ բաբախման պատճառ դառնալ: