ԱՄՆ օրենսդրությունն արգելում է ամերիկյան արտադրության ինքնաթիռների ու ավիացիոն պահեստամասերի փոխանցումը Իրանին
ՔԱՂԱՔԱԿԱՆՈՒԹՅՈՒՆ
Փետրվարի 23-ն էր, որ վարչապետի՝ ավիացիայի գծով նախկին խորհրդական Հակոբ Ճաղարյանն իր էջում տեղեկություն հրապարակեց օդանավի Իրանում հայտնվելու մասին։ Նույն օրը Հայաստանի քաղաքացիական ավիացիան, իսկ հաջորդ օրը ինքնաթիռը վարձակալած «Ֆլայ Արմենիա» ավիաընկերությունը հաղորդագրություն տարածեցին` պարզաբանելով, որ օդանավի վրա ընթանում էին տեխնիկական աշխատանքներ և դրանք շարունակելու նպատակով օդանավը պետք է տեղափոխվեր Ուկրաինայի «Հոստոմել» օդանավակայան։
Փետրվարի 20-ին, սակայն, օդանավն անհայտ պատճառներով հայտնվել է Իրանի «Մեհրաբադ» օդանավակայանում։
Այս մասին 1or.am կայքը հարցում է ուղարկել ԱՄՆ դեսպանատուն` պարզելու համար, թե ինչ տեղեկատվություն ունեն «Boeing 737-300»-ի մասին։
Հարցմանն ի պատասխան ԱՄՆ դեսպանատնից 1or.am-ին տեղեկացրել են, որ իրենք կապի մեջ են Հայաստանի գործընկերների հետ։
«ԱՄՆ կառավարությունը տեղյակ է, որ հայկական ընկերության անունով գրանցված ինքնաթիռը շեղվել է դեպի Իրան և դեռևս գտնվում է այդ երկրում։ Մենք կապի մեջ ենք Հայաստանի մեր գործընկերների հետ:
Տեղյակ ենք, որ կառավարությունը հետաքննություն է սկսել և քայլեր է ձեռնարկում ինքնաթիռը վերադարձնելու ուղղությամբ։ Մենք վերահաստատում ենք, որ ԱՄՆ օրենսդրությունն արգելում է ամերիկյան արտադրության ինքնաթիռների ու ավիացիոն պահեստամասերի փոխանցումը կամ այլ կերպ դրանց տրամադրումը Իրանին և նման գործողություններում ներգրավված կառույցները կարող են հայտնվել ԱՄՆ պատժամիջոցների տիրույթում»։
Սոնա Գիշյան
