Նիկոլիզմի հերթական վառ ներկայացուցիչը
ՎԵՐԼՈՒԾՈՒԹՅՈՒՆՆԵՐ
«Իմ քայլ»-ի նորաթուխ պատգամավոր Վահագն Ալեքսանյանն այսօր լրագրողների հետ ճեպազրույցում հերթական նիկոլական միտքն է նետել շրջակա միջավայր։ Նա նշել է, որ «25 տարի բանակը թալանել են, 2.5 տարում մեզ չէր հաջողվելու դա վերականգնել»։ Այն, որ այս մարդիկ պաթոլոգիկ ստախոսներ են, դա արդեն անհերքելի է, այն, որ նույն հարցի շուրջ օրումեջ իրար հակասող հայտարարություններ կարող են անել, դա էլ է փաստ, այն, որ իրենց բոլոր ձախողումներում մեղավոր են միայն նախկինները, դա էլ է փաստ։ Բայց այդուհանդերձ մի քանի հարց իմքայլական պատգամավորին։
Նախ, եթե 25 տարի բանակը թալանել են, որտեղի՞ց այդքան զենք ու տեխնիկա հայտնվեց ադրբեջանցիների ձեռքում որպես ռազմավար։ Ձեր «կիրթը» նշում է, որ Հայաստանի զինված ուժերից առգրավել են շուրջ 5 միլիարդ դոլարի զենք, զինամթերք։
Հաջորդը՝ Նիկոլ Փաշինյանը մինչև պատերազմն հպարտանում էր, թե Հայկական զինված ուժերը տարածաշրջանում ամենամարտունակն են, որ խաղաղություն ենք պարտադրում թշնամուն, իսկ Պաշտպանության նախարարը «Նոր պատերազմ, նոր տարածքներ» կոնցեպտն էր մատուցում հանրությանը։ Ո՞նց էր նման բան ասում Նիկոլ Փաշինյանը։
Եվ վերջապես երրորդ՝ եթե թալանել էին ու զենք չկար կռվելու, ապա ինչո՞ւ էր ձեր քաղաքական անմեղսունակների իշխանությունը 44 օր գոռում, որ հաղթում ենք, արդյունքում տասնյակ հազարավոր զինծառայողներ զոհվեցին ու տարածքներ կորցրեցինք։ Այս մարդիկ բացահայտ ծաղրում են հանրությանը, անամոթաբար խեղում բոլոր փաստերը, իրադարձությունները։ Նիկոլ Փաշինյանն ու իր թիմն ամեն օր արնաքամ են անում Հայաստանն ու Արցախը։ Հայ ժողովրդի ազգային արժանապատվությունը տրորելով ապրում են՝ չմտածելով ուրիշ ոչ մի բանի մասին՝ բացառությամ իրենց իշխանության վերարտադրությունը։ Սա է, ուրիշ ոչինչ չկա ու չի լինելու, քանի դեռ հայ ազգը հանդուրժում է այս մարդկանց գոյությունը իշխանության ղեկին։
Անի Առաքելյան
