Կարող եմ պատկերացնել, թե ինչ կպատահի, եթե Հայաստանը անցնի Աշխարհի առաջնության եզրափակիչ. Կապարրոս
ՍՊՈՐՏ
championat.com-ը գրում է, որ Հայաստանի ֆուտբոլի ազգային հավաքականի գլխավոր մարզիչ, իսպանացի Խոակին Կապարրոսը գնահատել է Քաթարում կայանալիք Աշխարհի առաջնությանը հայտնվելու իր թիմի հեռանկարները: Հայաստանը ընտրական մրցաշարում մեկնարկել է երեք հաղթանակով և խմբում առաջատար է:
«Հայաստանում ցանկանում են զարգանալ, և այստեղ նրանք գիտեն, որ դա կախված է առկա մարզիչների որակավորումից: Մենք տեսնում ենք արդյունքներ, որոնք վստահություն են ներշնչում բոլորին: Ազգերի լիգայի B խմբում հայտնվելը պարգևատրում էր կատարված աշխատանքի համար, բայց նաև անսպասելի էր, քանի որ մրցում էինք այնպիսի որակյալ թիմերի հետ, ինչպիսիք են Վրաստանը և Հյուսիսային Մակեդոնիան: Այս հաջողությունը լուրջ բարոյահոգեբանական վիճակ է ստեղծել երկրի և թիմի համար: Հայաստանը պետք է հավատա կատարված աշխատանքին: Որպես թիմ մենք խոսում ենք չորս լեզուներով՝ ռուսերեն, հայերեն, անգլերեն և իսպաներեն: Հաղորդակցությունը նորմալ է, իսկ ֆուտբոլը նաև ունիվերսալ լեզու է: Խաղադաշտում բոլորը հասկանում են միմյանց: Այս ոչ վերբալ հաղորդակցությունը թիմի հիմքն է», - Կապարրոսի խոսքերն է մեջբերել FIFA-ի կայքը:
2022 թվականի աշխարհի առաջնության ընտրական փուլի առաջին խաղերում Հայաստանը հաղթել է Ռումինիային, Իսլանդիային և Լիխտենշտեյնին: Կապարրոսը ասում է, որ չնայած դրան ինքը գիտակցում է մրցակիցների ուժը.
«Մենք մեծ ոգևորությամբ սկսեցինք գործը, բայց գիտակցում ենք, թե որքան ուժեղ է մեր խումբը: Մենք խաղում ենք այնպիսի թիմերի հետ, ինչպիսիք են Ռումինիան, Իսլանդիան, Հյուսիսային Մակեդոնիան և հատկապես Գերմանիան, որոնք շատ ուժեղ են: Բայց մենք լի ենք հույսով, և ոչ ոք չի կարող դա խլել մեզանից: Հաջորդ հանդիպումները կլինեն միայն սեպտեմբերին, այնպես որ կտեսնենք, թե ինչպես կխաղան ֆուտբոլիստները: Մենք ապավինում ենք մեր թիմի ուժին, ինչպես նաև մտավոր ամրությանը: Միայն Ազգերի լիգայում առաջընթացը ազգի կողմից շատ հուզիչ էր, այնպես որ ես պատկերացնում եմ, թե ինչպիսին կլինի Աշխարհի գավաթի խաղարկությունը: Այնուամենայնիվ, ես նույնիսկ դրա մասին չէի էլ մտածում: Ես երկար տարիներ ֆուտբոլ եմ խաղում, ուստի գիտեմ, որ պետք է քայլ առ քայլ աշխատել: Այնպես որ, թող Հայաստանի ժողովուրդը վայելի իր հաղթանակները, իսկ մենք կկենտրոնանաք մեր աշխատանքային մեթոդների վրա»:
Նյութը հրապարակման պատրաստեց Կամո Խաչիկյանը
