«Մենք նրանց խանգարում ենք». Լևոն Յոլյանը մերժեց նաիրիտցիներին
ՀԱՍԱՐԱԿՈՒԹՅՈՒՆ
ԼՈՒՐԵՐ.com-ն արդեն գրել է, որ Էներգետիկայի և բնական պաշարների նախարար Լևոն Յոլյանի նախաձեռնությամբ ստեղծվել է աշխատանքային խումբ՝ «Նաիրիտ» ՓԲԸ-ում առկա վիճակը և հետագա անելիքներն ուսումնասիրելու համար։ Նաիրիտցիները, իհարկե, ողջունեցին նորանշանակ նախարարի այս քայլը, սակայն վերջիններս նոր պահանջ ունեն։ Նաիրիտցիները ցանկանում են այդ աշխատանքային խմբում տեսնել իրենց համար վստահելի մարդկանց։ Այդ նպատակով այսօր նամակով դիմեցին Յոլյանին։
Կառավարության նիստից հետո նախարար Յոլյանը մուտքի մոտ հավաքված նաիրիտցիների հետ մի քանի րոպե զրուցեց։ Գործարանի նախկին աշխատակիցները նշեցին, որ ուզում են այդ աշխատանքային խմբում տեսնել իրենց համար վստահելի մարդկանց, մասնավորապես՝ նախկին տնօրեն Կարեն Իսրայելյանին և մասնագետ Գագիկ Ավետիսյանին։
Էներգետիկայի նախարարը նաիրիտցիներիին հիասթափեցրեց՝ ասելով, որ այդ աշխատանքային խմբում նաիրիտցիներից մարդ չի կարող ընդգրկված լինել։ Նախարարը հավաքվածներին առաջարկեց ստեղծել իրենց խումբը։ Գործարանի աշխատակիցները դժգոհեցին, իրենց համար նախարարի այս պատասխանն անակնկալ էր։ «Նա լրիվ փոխվել էր, առաջին անգամ ավելի դրական էր տրամադրված»,- ասում է գործարանի աշխատակիցներից մեկը։
Նաիրիտցիները հակված են մտածել՝ կառավարությունում, նախարարությունում չեն ցանկանում, որպեսզի իրենց աշխատանքային խմբի անդամներից բացի, այլ մարդիկ ինֆորմացիայի տիրապետեն։ «Մենք նրանց խանգարում ենք»,- ասում են աշխատակիցները։ Գործարանի նախկին աշխատակիցները շարունակելու են ամեն հինգշաբթի հավաքվել կառավարության դիմաց՝ գործարանի վերագործարկման պահանջով։
Նշենք, որ երեկ Ազգային ժողովում ՀԱԿ խմբակցության ղեկավար Լևոն Զուրաբյանն էր բարձրաձայնել հարցը, թե ինչու ստեղծված աշխատանքային խմբում գործարանի մասնագետներից ոչ ոք ներգրավված չէ։
Հիշեցնենք՝ նախարար Լևոն Յոլյանը երեկ խորհրդարանում հայտարարեց, որ ինքը կանի մաքսիմալը՝ գործարանի վերագործարկման համար։ Նախարարը նաև հայտարարեց՝ Հայաստանի էներգետիկայի և բնական պաշարների նախարարությունը ռուսական «ՌՏ-Քիմկոմպոզիտ» ընկերությունից մինչև ապրիլի 1-ը տեխնիկական առաջարկներ կստանա «Նաիրիտ» գործարանի վերաբերյալ: Հարկ ենք համարում նշել, որ այս ընկերության նախագահների խորհրդի անդամ է Ռուսաստանի հայերի միության նախագահ Արա Աբրահամյանը։
