Գերիների հարցի վերաբերյալ Ադրբեջանի կողմից բարի կամք չի լինելու, դա պետք է հասկանա ՀՀ ներկա իշխանությունը. Հրանտ Միքայելյան (տեսանյութ)
ՔԱՂԱՔԱԿԱՆՈՒԹՅՈՒՆԹեև տեղյակ չեմ, թե գերիների վերադարձի վերաբերյալ ինչ գործընթաց է տեղի ունեցել Մոսկվայի, Երևանի և Բաքվի միջև, բայց ակնհայտ է՝ գերիների հարցը չլուծվեց: Բաքուն հարցը առևտուրի է վերածում և հարց է ծագում, թե մենք ի՞նչ ունենք առաջարկելու գերիների դիմաց. երբ դեկտեմբերին դե ֆակտո ՀՀ իշխանություններն Ադրբեջանի բոլոր գերիներին հանձնեցին, վերջինս հայ գերիներից ոչ մեկին էլ չի վերադարձնելու: Այս մասին Tert.am-ի հետ զրույցում ասաց քաղաքագետ Հրանտ Միքայելյանը:
Դիտարկմանը՝ Նիկոլ Փաշինյանը Պուտինի հետ հանդիպումից հետո նշեց, որ Ռուսաստանի նախագահի հետ բաց հարաբերություններ են հաստատվել, համագործակցությանը պետք է ավելի մեծ խորություն հաղորդել, և հարցին՝ թե ինչպե՞ս եք գնահատում Ռուսաստանի և Հայաստանի հարաբերությունները, քաղաքագետը նշեց՝ հայտարարությունների մակարդակով Հայաստանի և Ռուսաստանի հետ հարաբերություններն երբեք վատ չեն եղել, հարց է, թե ի՞նչ է այդ հայտարարություններից բացի տեղի ունենում.
«Հանդիպման ժամանակ Նիկոլ Փաշինյանի առաջ քաշած օրակարգը, կարելի է ասել, կարևոր է Հայաստանի համար, սակայն կարևոր հարց է՝ ինչ է արվում: Օրինակ՝ Հայաստանի իշխանությունը ատոմակայանի վերաբերյալ ռուսական վարկը մերժել է, այդ թվում՝ դրսի ուժերի դրդմամբ, Ռուսաստանում, իհարկե, դրա մասին տեղյակ են: Ի՞նչ է տեղի ունեցել, այս հարցի պատասխանը մենք դեռ չունենք: Կամ ի՞նչ է արվում ռազմատեխնիկական կամ ռազմական համագործակցության շուրջ, մենք որևէ քայլ չենք տեսնում, բայց տեսնում ենք, որ ԳՇ ղեկավար նշանակվում է մարդ, ով վարկաբերկված է նույն դե ֆակտո իշխանությունների կողմից»,-ասաց Միքայելյանը:
Դիտարկմանը, թե Թուրքիայի արտգործնախարարը նշել է, որ հրադադարը Ղարաբաղում լավ հնարավորություն է, եթե Հայաստանը դրական արձագանքի, ապա Հարավային Կովկասը հետագայում կարող է դառնալ խաղաղության և կայունության տարածաշրջան, և հարցին՝ ապրիլի 24-ին ընդառաջ այս հայտարարությունը կարո՞ղ ենք դիտարկել Թուրքիայի կողմից որպես հերթական խորամանկ դիվանագիտական քայլ՝ հաշվի առնելով, որ կարծիքներ կան, թե ԱՄՆ նոր վարչակազմը շատ մոտ է Հայոց ցեղասպանության ճանաչմանը, քաղաքագետը նշեց, որ գործող իշխանություններն այսպիսի էժանագին մանիպուլյացիաների չպետք է տրվեն.
«Այսպիսի հայտարարությունները չպետք է ազդեն Հայաստանի դիրքորոշման վրա, այսինքն Թուրքիան հրահրում է պատերազմ, հարձակվում է Հայաստանի և Սիրիայի վրա, և տարածաշրջանում խաղաղությո՞ւն է հայտարարում: Թուրքիան առաջին և միակ սպառնալիքն է ամբողջ տարածաշրջանում, եթե դա հայ իշխանություններն հասկանում են, լավ է, եթե ոչ, ապա այս գործողությունները Հայաստանի շահերից չի բխում»:
Քաղաքագետը խոսելով այն մասին, թե Թուրքիայի հետ տարածքների բացումը տնտեսական ի՞նչ խնդիրներ կարող է առաջացնել, նշեց, որ Թուրքիայի հետ սահմանի բացումը մեզ պետք չէ այնքան, որքան՝ իրենց. «Դա Թուրքիայի պարտականություն է, որը պետք է հասցնել ՄԱԿ, ԵԱՀԿ և այլ հարթակներ, ոչ թե Հայաստանի տարածքից զիջումներ անել, որ նրանք բավարարվեն: Նրանք երբեք բավարարված չեն լինելու: Նույնիսկ գերիների հարցի վերաբերյալ Ադրբեջանի կողմից բարի կամք չի լինելու, դա պետք է հասկանա ՀՀ ներկա իշխանությունը»:
Մանրամասները՝ տեսանյութում
