Կառավարությունն ավելացնում է գիտության ֆինանսավորումը. գիտնականների աշխատավարձը կավելանա
ՀԱՍԱՐԱԿՈՒԹՅՈՒՆ
Գիտական և գիտատեխնիկական գործունեության ծրագրերին 2021թ–ի բյուջեով հատկացված ֆինանսական միջոցները կավելացվեն 2 784 565 400 դրամով։ ԿԳՄՍ նախարարության այս առաջարկն այսօր հաստատվեց կառավարության հերթական նիստում։
Նախագիծը ներկայացնող փոխնախարար Ժաննա Անդրեասյանը հայտնեց, որ ավելացվող միջոցներն ուղղվելու են 2 հիմնական ոլորտների` թեմատիկ գիտական հետազոտություններին և ենթակառուցվածքի արդիականացման ծրագրերին (լաբորատորիաներ, ժամանակակից սարքավորումներ և այլն)։
«Սրա միջոցով կկարողանանք ապահովել գիտական հետազոտությունների համար անհրաժեշտ հենքը, սա կբերի հետազոտւթյունների որակի բարձրացման ու հնարավորություն կստեղծի որակյալ կիրառական հետազոտություններ անցկացնելու, ինչը շատ կարևոր է նաև գիտության զարգացան համար»,– ասաց փոխնախարարը։
Անդրեասյանը նաև հայտնեց, որ ստեղծվելու են գիտական կոնսորցիումներ` սարքավորումներից համատեղ օգտվելու հնարավորություն ունենալու համար։
«Ծախսերը ներառում են նաև 114 400 000 դրամի չափով ԳԱԱ համակարգի սարքավորումների վերազինման նպատակով, որը մասնավորապես ծախսվելու է սուպերհամակարգչի տեղափոխման ու տեղադրման համար»,– ասաց Անդրեասյանը։
Ավելի քան 6 մլրդ դրամ էլ հատկացվելու է թեմատիկ գիտական հետազոտություններին։ Փոխնախարարը խոսքով, դա հնարավորություն կտա ֆինանսավորել բարձր միավորներ ստացած գիտական ծրագրերը։
«Ծրագրերն ունեն 2 տարի ժամկետ։ Դրամաշնորհներն իրականացվում են գիտական փորձաքննության արդյունքներով, սահմանված են միջազգային բարձր մակարդակի վերջնարդյունքներ»,– ասաց նա։
Վարչապետ Նիկոլ Փաշինյանը շեշտեց, որ ծրագիրը գիտության ֆինանսավորման ավելացման միայն առաջին փուլն է, որի ընթացքում նոր գիտական ծրագրեր են փորձարկվելու, ու գիտական ներուժի խրախուսման գործընթացը լինելու է շարունակական։
Փոխվարչապետ Տիգրան Ավինյանն էլ հայտարարեց, որ 2022թ–ի հունվարից բարձրացվելու են գիտական ոլորտի աշխատավարձերը։
«Ասպիրանտից մինչև ինստիտուտի ղեկավար բոլոր մակարդակներում վերանայվելու են աշխատավարձերը»,– վստահեցրեց Ավինյանը` նշելով, որ դա կարևոր է գիտությունը երիտասարդության համար գրավիչ դարձնելու համար։
«Երիտասարդները գնալու են դեպի գիտություն ու հնարավորություն են ունենալու գիտությամբ զբաղվելով ապրել, արարել ու այլ որևէ բանի մասին չմտածել, չփորձել այլընտրանքային աշխատանքներ գտնել»,– ասաց Ավինյանը։
Կառավարությունը հավանություն տվեց ԿԳՄՍ–ի օրենսդրական նախաձեռնությունը։ Այն առաջիկայում կներկայացվի խորհրդարանի հաստատմանը։
Հիշեցնենք, որ 2021թ–ի պետական բյուջեով մինչ այս փոփոխությունը գիտական և գիտատեխնիկական գործունեության ծրագրերին հատկացված էր 13 104 247 300 դրամ։
