«Նախկինների» հերթական կադրը՝ իմքայլականների «սրտի» դատավոր

Խորհրդարանում այսօր ավարտվել է Վճռաբեկ դատարանի դատավորի ընտրության համար անցկացվող քվեարկությունը, որի արդյունքներով դատավոր է ընտրվել Արսեն Մկրտչյանը: Ուշագրավ է, որ վերջինիս անունը շոշափվում էր օրեր առաջ մամուլում տեղ գտած մի հոդվածի շրջանակներում, որի համաձայն Մկրտչյանը ճաշել է վարչապետ Նիկոլ Փաշինյանի հետ, վերջինս էլ նրան խոստացել է, որ ընտրությունն ԱԺ-ում կանցնի հալած յուղի պես, իհարկե, պայմանով, որ վերջինս հետագայում ճիշտ կաշխատի վնգստացող դատավորների հետ: 

Ուշագրավ է, թե ինչ աշխատանքային կարիերա է ունեցել Արսեն Մկրտչյանը մինչ այս պաշտոնը ստանձնելը: 2014 թ. մայիսի 8-ին ՀՀ վարչապետի որոշմամբ նշանակվել է Հայաստանի Հանրապետության արդարադատության նախարարի տեղակալ: 2014 թ. հունիսի 26-ին ՀՀ վարչապետի որոշմամբ նշանակվել է Հայաստանի Հանրապետության արդարադատության նախարարի առաջին տեղակալ՝ ազատվելով Հայաստանի Հանրապետության արդարադատության նախարարի տեղակալի պաշտոնից: 2015 թ. հուլիսի 14-ից սեպտեմբերի 4-ը եղել է Հայաստանի Հանրապետության արդարադատության նախարարի պաշտոնակատար: Այսինքն՝ Մկրտչյանը հերթական նախկին կադրն է, Սերժ Սարգսյանի արդարադատության նախարարի տեղակալը և նախարարի ԺՊ-ն, ով Սերժ Սարգսյանին մերժած իմքայլականների ձեռամբ այսօր նոր պաշտոն է ստանում:

Ի դեպ, իշխանություններին, կարծես, չի հուզում, որ Մկրտչյանը հանդիսանում է ՀՀ ամենահարուստ դատավորներից մեկը: Օրինակ  2020 թվականի հայտարարագրում նա նշել է չորս անշարժ գույք, մեկ «Լեքսուս» ավտոմեքենա, մեկ «Մերսեդես» մակնիշի ավտոմեքենա, 16,170,000.00 դրամի փոխառություն, 1,860,000.00 և 1,264,910.00 դրամի փոխառություն, 10,680,054.00 աշխատավարձ ՀՀ վերաքննիչ քաղաքացիական դատարանից, 423,907.00 դրամի աշխատավարձ  ՀՀ Արդարադատության ակադեմիայից: Հետաքրքիր է, որ դատավորների բարեվարքության ստուգմամբ տառապող իշխանությունները, որոնք հաշվում են իրենց սրտին ոչ հաճո դատավորների ամեն մի լուման, այս դեպքում այդքան սկզբունքային, կարծես թե, չեն գտնվել...