Ինչո՞ւ են ուշացնում Երեւանի «Շտապօգնության» աշխատակիցների աշխատավարձը
ՀԱՍԱՐԱԿՈՒԹՅՈՒՆ
«Շտապօգնության» աշխատակիցները սովորաբար աշխատավարձը ստանում են մինչեւ ամեն ամսվա 15-ը: Բայց այս ամիս աշխատավարձերն իսկապես ուշացել են: Այս մասին NEWS.am Medicine-ի հետ զրույցում հայտնեց «Շտապօգնություն» ՓԲԸ տնօրեն Թագուհի Ստեփանյանը:
Նրա խոսքով՝ հաստատությունը ֆինանսավորման խնդիր ունի, որը, ինչպես սպասվում է, կլուծվի առաջիկա օրերին, նախնական՝ մինչ երկուշաբթի:
«Այս խնդիրն, իհարկե, կլուծվի: Մեր աշխատակիցներն առանց աշխատավաձի չեն մնալու: Մենք ամեն ինչ անում ենք, որ այդ խնդիրը լուծվի»,- ասաց Թագուհի Ստեփանյանը:
Հիշեցնենք, որ «շտապօգնության» աշխատակից Աննա Արսենյանը Facebook-ում գրել էր, որ այս ամիս «շտապի» բուժաշխատողները դեռեւս աշխատավարձ չեն ստացել:
«Մենք ամեն օր գործ ունենք ավելի քան 1000 քաղաքացու հետ, որոնք մեր կարիքն ունեն, իսկ պետությունը ոչ միայն չի գնահատռում կատարած աշխատանքը, այլեւ քննարկման չի դնում մեր աշխատավարձի վճարման հարցը... Ես հասկանում եմ, որ երկիրը վատ վիճակում է, բայց բժիշկներին հետին պլան մղելով՝ դուք ավերում եք երկրի հիմքերը»,- գրել է նա:
«Շտապօգնության» մի քանի աշխատակիցներ, որոնք չցանկացան իրենց անունները հրապարակել, NEWS.am Medicine-ի հետ զրույցում ասացին, որ անցյալում իրենց աշխատավարձերը գործնականում չեն ուշացվել. աշխատավարձի հետ կապված խնդիրն առաջացել է հենց այս ամիս:
