Ռուսաստանի եւ Թուրքիայի շահերը գտնվում են հակառակ բեւեռներում. փորձագետ
ՄԻՋԱԶԳԱՅԻՆ
Հայ-ռուսական հարաբերությունները կարեւոր ենթատեքստեր ունեն: Ռուսաստանը տարածաշրջանում հետապնդում է իր շահերը, որոնք համատեղելի չեն Թուրքիայի եւ Ադրբեջանի շահերի հետ, եւ դա ակնհայտ է: Այս մասին այսօր լրագրողների հետ զրույցում ասաց ԵՊՀ արեւելագիտության ֆակուլտետի դեկան, պրոֆեսոր, թուրքագետ Ռուբեն Մելքոնյանը:
«Մի կողմից, Թուրքիան թշնամական պետություն է մեզ համար, մյուս կողմից` Ռուսաստանը մեր դաշնակիցն է: Ռուսաստանի եւ Թուրքիայի շահերը գտնվում են հակառակ բեւեռներում: Անհրաժեշտ է առավելագույնս օգտագործել հայ-ռուսական հարաբերություններից բխող դրական հնարավորությունները, հատկապես նոյեմբերի 9-ին հայտարարության ստորագրումից հետո, երբ Ռուսաստանը՝ ընդլայնելով իր ներկայությունը, սկսեց նաեւ խաղաղապահ առաքելություն իրականացնել Արցախում»,-նշեց փորձագետը:
«Միեւնույն ժամանակ հայ-ռուսական դաշնակցային հարաբերությունների դեմ ուղղված ակտիվ քարոզչություն է ընթանում, այդ պատճառով փորձագետների ճիշտ գնահատականը կարող է կարեւոր դեր խաղալ հասարակությանն ուղղորդելու հարցում: Իհարկել, պետք է ամեն ինչ դիտարկել պետական շահերի շրջանակում, եւ հենց դրա հիման վրա պետք է կառուցել երկկողմ հարաբերություններ»,-եզրափակեց նա:
