Արտահերթ ընտրություններ պետք է լինեն միայն ընտրական օրենսգրքի փոփոխությունից հետո
ՔԱՂԱՔԱԿԱՆՈՒԹՅՈՒՆ
«Լուսավոր Հայաստան» կուսակցությունը պատրաստ է մինչև հունիսի 1-ը մասնակցելու արտահերթ ընտրությունների ցանկացած Ընտրական օրենսգրքով: Այս թեմայով 1or.am կայքը զրուցել է քաղաքագետ Հայկ Սուքիասյանի հետ` պարզելու համար, թե մինչ Ընտրական օրենսգրքի փոփոխությունը որքանով են նպատակահարմար արտահերթ ընտրությունները։ Հայկ Սուքիասյանը կարծում է, որ այս ընդիմության նպատակը երկրում անկայունություն առաջացնելն է․
«Իրենց նպատակը անընդհատ անկայունություն առաջացնելն է, քանի որ ժամանակին պահանջում էին, որ պետք է Ընտրական օրենսգիրքը փոփոխվի, դե սպասեք Ընտրական օրենսգիրքը փոփոխվի նոր գնացեք ընտրությունների։ Իրենք բացարձակապես գաղափար չունեն, թե ինչ է նշանակում պետություն, իշխանությունն առաջարկել է արտահերթ ընտրություն, առաջարկել է Ընտրական օրենսգրքի փոփոխություն, սպասեք փոխեն, նոր գնացեք ընտրության։ Այդ ընդդիմությունը հակաքաղաքական կառույց է, որի միակ նպատակը ամեն ինչին հակադարձելն է, իսկ իրական ընդդիմության նպատակը միայն ամեն ինչին հակադարձելն է՞, սա ինչ մտածողություն է։ Իրենց նպատակը Հայաստանի քաղաքական կյանքի կայունության, հայ ժողովրդի շահերի հետ առնչություն չունեցող ինտրիգային հայտարարություններն են։ Ընդհանրապես, Հայաստանում քաղաքականությունը ինտրիգային է և սա ամենավատ բանն է։ Իշխանությունն իր տեղն է անկայունություն առաջացնում, նախագահն իր տեղն է անկայունություն առաջացնում, ընդդիմությունն էլ՝ իր հերթին։ Եվ ես բոլորին առաջարկում եմ, եթե դուք իրականում Հայաստանի հետ կապ ունեցող քաղաքական կազմակերպություններ եք, ապա ես ճիշտ եմ գտնում, որ Հայաստանում այս պահին կայունություն կապահովի միայն հանրաքվեն, արտահերթ ընտրությունները Հայաստանում կայունություն չեն ստեղծի, քանի որ դրանք ավելի շատ են խրելու Հայաստանը ցեխի մեջ և կան ուժեր, ովքեր հետընտրական պրոցեսներ են սկսելու։ Այդ ուժերը արդեն իսկ իրենց համար տեսական պլատֆորմ են ստեղծել` դեռ չկայացած ընտրությունները որակելով որպես կեղծ ու ընտրակեղծիքներից խոսում են նրանք, ովքեր երեսուն տարի զբաղվել են ընտրակողծիքներով և ինչի համար են այսօր անում այդ հայտարարությունները, որովհետև վստահ են, որ չեն անցնելու կամ հազիվ հազ են անցնելու և սկսելու են հետընտրական պրոցեսներ։ Հայաստանում կայունություն լինելու համար կարծում եմ, որ միակ ճանապարհը հանրաքվեն է»։
Հարցին,եթե չփոխված Ընտրական օրենսգրքով տեղի ունենան արտահերթ ընտրություններ, մենք որակապես այլ խորհրդարան չե՞նք կարող ակնկալել քաղաքագետը պատասխանել է․
«Կարող ենք ակնկալել որակապես ավելի այլանդակ խորհրդարան և լինելու է ավելի վատ խորհրդարան, որը Հայաստանում առաջացնելու է մշտական անկայունություններ և տուժելու է Հայաստանը :Ուզում եք արտահերթ ընտրություններ, ապա փոխեք ընտրական օրենսգիրքը նոր գնացեք ընտրությունների։ Լինում է համամասնական ընտրական օրենսգիրք՝ կուսակցություններով, այլ ոչ թե ՀՀԿ-ի բզտրած ընտրական օրենսգրքով, որը խայտառակություն է։ Նոր ընտրական օրենսգրքով էլի որոշ չափով կա հավանականություն, որ կառաջանա կայուն պետություն և խորհրդարանն էլ քիչ թե շատ տեսք կունենա։ Հակառակ պարագայում ավելի վատ խորհրդարան է առաջանում»։
Անդրադառնալով նոր քաղաքական ուժերի ձևավորմանը Հայկ Սուքիասյանը կարծում է, որ մեզ մոտ քաղաքականությունը պատկերային է․
«Մենք պետք է ընտրենք եղածից, շատ լավ կլիներ, որ մենք Գերմանիայի նման քաղաքական համակարգ ունենայինք, բայց ցավոք մենք այդպիսին չենք և Հայաստանում ընտրում են սովորաբար եղածների մեջից։ Ես կարծում եմ լավագույն տարբերակը կլիներ հանրաքվեն, բայց քանի որ ոչ իշխանությունը, ոչ ընդդիմությունը չի ուզում լսել հանրաքվեի մասին և ընտրել են արտահերթ ընտրությունները, այդ դեպքում մնում է ընտրություն կատարել ԼՀԿ-ի, ԲՀԿ-ի, Իմ քայլը դաշինքի, Հայաստանը կողոպտած, բայց այսօր փրկիչների դեմքով հանդես եկող արիստոտելների խմբերի, և ժողովրդական բևեռ՝ «Սասնա ծռերը»-ի, ինչպես նաև այլ քաղաքական ուժերի մեջ, և ում ուզում է ժողովուրդը թող գնա ընտրի բայց միայն նոր ընտրական օրենսգրքով»։
Սոնա Գիշյան
