Փաշինյանին ցույց են տվել դուռը․ ու՞մ է ձեռնտու հեղաշրջումը Հայաստանում
ՔԱՂԱՔԱԿԱՆՈՒԹՅՈՒՆ
newizv.ru-ն գրում է, որ Հայաստանում վերսկսվել են ժողովրդական հուզումները: Երկրի զինված ուժերը պահանջում են վարչապետ Նիկոլ Փաշինյանի և կառավարության հրաժարականը: Զինված ուժերի գլխավոր շտաբի այդ հայտարարությունը Փաշինյանը անվանել է ռազմական հեղաշրջման փորձ:
Վարչապետը աշխատանքից ազատել է Հայաստանի զինված ուժերի գլխավոր շտաբի պետ Օնիկ Գասպարյանին, որն էլ պահանջում է նրա հրաժարականը:
Հիշեցնենք, որ ընդդիմությունն արդեն մի քանի անգամ պահանջել է վարչապետ Նիկոլ Փաշինյանի հրաժարականը, որին մեղավոր է համարում Ղարաբաղում ռազմական ձախողումների մեջ: Երկրում բողոքի ցույցերը շարունակվում են նոյեմբերից։ Հետաքրքիր է, որ փետրվարի 24-ին Փաշինյանն ասել է, որ «Իսկանդեր»-ը եղել է անարդյունավետ պատերազմի ընթացքում, և արձակված հրթիռների միայն 10%-ն է պայթել: Գլխավոր շտաբի պետի տեղակալ Տիրան Խաչատրյանը Փաշինյանի խոսքերը համարել է «անլուրջ» և նույն օրը ազատվել աշխատանքից: Ի պատասխան դրա` Հայաստանի գլխավոր շտաբը պահանջել է վարչապետի հրաժարականը նշելով, որ ներկայիս կառավարությունը «ի վիճակի չէ համարժեք որոշումներ կայացնել այս ճգնաժամային իրավիճակում»: Իր հերթին, Փաշինյանն այդ հայտարարությունն անվանել է ռազմական հեղաշրջման փորձ, իր կողմնակիցներին կանչել է կառավարության տուն, և հայտարարել է Գլխավոր շտաբի պետ Օնիկ Գասպարյանի պաշտոնանկության մասին, որը դեռ պետք է հաստատվի Հայաստանի նախագահի կողմից: Ըստ Փաշինյանի` բանակը դեռ ենթակա է վարչապետին ու ժողովրդին: Նա զինված ուժերի հայտարարությունը անվանել է հուզական արձագանք, իսկ երկրում իրավիճակը «լարված, բայց կառավարելի»: Փաշինյանը պատրաստ է մեղադրել զինվորականներին սպառազինությունների գնումներում կոռուպցիայի մեջ և սկսել զանգվածային զտումներ: Միաժամանակ, Հայաստանի ԱԱԾ-ն հայտարարել է իր հավատարմությունը Փաշինյանին:
Լրագրող Ալեքսեյ Վենեդիկտովը իր ալիքում գրել է, որ Հայաստանի նախկին նախագահներ Ռոբերտ Քոչարյանն ու Սերժ Սարգսյանը կոչ են արել աջակցել զինվորականներին ՝ պահանջելով Փաշինյանի հեռացումը: Միևնույն ժամանակ, Ռուսաստանում սկսել են հայտնվել հայկական իրադարձությունների ցանկալի արդյունքի ակնարկներ.
«Կրեմլը հնարավոր է համարում Փաշինյանի հեռացումը Հայաստանի վարչապետի պաշտոնից և «դա լավ դաս կլինի նրանց համար, որոնք հավատում են մայդաններով ռեժիմները փոխելուն», Ռուսաստանը որևէ խնդիր չի տեսնում նման զարգացման մեջ», - ասել են Ռուսաստանի նախագահի վարչակազմում:
Քաղաքագետ Իլյա Գրաշչենկովը իրավիճակը մեկնաբանում է հետևյալ կերպ.
«Հայաստանում իրադարձությունները ձեռնտու են Մոսկվային այն իմաստով, որ Փաշինյանի հնարավոր հեռացումը կազատի նրան մի քաղաքական գործչից, որը ղարաբաղյան երկրորդ պատերազմում պարտությունն արդարացնում է Ռուսաստանի կողմից օգնության բացակայությամբ, բացի այդ, Կրեմլում Փաշինյանը երբեք չի համարվել «յուրային», նա անտեսել է իր նախորդներին չհետապնդելու ռուսական կողմի խնդրանքները և, ընդհանուր առմամբ, իշխանության է եկել ժողովրդական հեղափոխության միջոցով: Ռուսաստանի համար զարգանում է հարմար քարոզչական տրամաբանությունը. Վրաստանը դարձել է հակառուսական և կորցրել Աբխազիան և Հարավային Օսիան, Ուկրաինան ընտրել է Արևմուտքը և կորցրել Ղրիմն ու Դոնբասը, Բելառուսը փորձել է խաղալ բազմավեկտոր և համարյա ստացել գունավոր հեղափոխություն, իսկ Հայաստանը փորձել է հեռանալ Մոսկվայից և պարտվել Ղարաբաղի պատերազմում: Այս ամենը հստակ ազդանշան է. եթե դուք մեզ հետ չեք, կորուստներ կունենաք, բայց եթե դուք ընկեր եք, ապա մենք ձեզ կհանենք ձեզ ցանկացած իրավիճակում, և Բաշար ալ-Ասադը դրա ապացույցն է... »:
Նյութը հրապարակման պատրաստեց Կամո Խաչիկյանը
