Մենք կրկեսի վերածելու հայրենիք չունենք
ՔԱՂԱՔԱԿԱՆՈՒԹՅՈՒՆ
Երբ դուք չգիտեք, թե որն է ճիշտ ու որը սխալ, ով է ճիշտ ու ով սխալ, ապա նայեք, լսեք որևէ կազմակերպության կողմից իրականացված հարցումներ: Ի դեպ, ես երբեք չեմ առաջնորդվել որևէ հարցման արդյունքներով, դրանք ինձ համար էական ազդեցություն չեն ունեցել իմ քաղաքական, քաղաքացիական հայացքներն ու համոզմունքները ձևավորելիս, իմ կարծիքն ունենալիս և այն ազատ շարադրելիս: Այդուհանդերձ տեսնենք, թե ինչ կա մեր երկրում վերջին հարցումներով պայամանավորված:
Այսպես՝ Gallup International-ի հայաստանյան ներկայացուցչության կողմից անցկացված վերջին հարցումը ցույց է տալիս, թե իբր Նիկոլ Փաշինյանը մնում է ամենաբարձր վարկանիշ ունեցող քաղաքական գործիչը: Քաղաքական գործիչներին 1-ից 5 սանդղակով գնահատելու խնդրանքին քաղաքացիները պատասխանել են հետևյալ կերպ, ներկայացված են միջին գնահատականները։
Վարչապետ Նիկոլ Փաշինյանը ստացել է 2,8 միավոր, նախագահ Արմեն Սարգսյանը՝ 2,3 միավոր, երկրորդ նախագահ Ռոբերտ Քոչարյանը՝ 2 միավոր, Գագիկ Ծառուկյանը հավաքել է 2,2 միավոր, Էդմոն Մարուքյանը՝ 1,8 միավոր: Այնուամենայնիվ, Փաշինյանի հրաժարականը պահանջողները շատացել են։ 43,6 տոկոսը կարծում է, որ նա պետք է հրաժարական տա, 38,8 տոկոսը կարծում է, որ Փաշինյանը պետք է մնա վարչապետի պաշտոնում։ Դժվարացել է պատասխանել մարդկանց 17,6%-ը։ Նախորդ հարցման ընթացքում (նոյեմբերի 13) վարչապետի հրաժարականը պահանջում էր հարցվածների 35 տոկոսը։ Այսինքն ինչ է ստացվում՝ Նիկոլ Փաշինյանի հրաժարականին կողմ է 43,6 տոկոսը, ավելին հրաժարական պահանջողների թիվը նոյեմբերի 13-ից հետո աճել է շուրջ 9 տոկոսով, բայց Նիկոլ Փաշինյանը շարունակում է մնալ ամենավարկանիշային գործիչը: Մի տեսակ տարօրինակ է:
Երկրորդ տարօրինակությունը՝ ի՞նչ կապ ունի առհասարակ Արմեն Սարգսյանը ու ո՞նց կարող է մի մարդու վարկանիշ լինել բարձր, եթե այդ մարդը ոչինչ չի անում:
Առաջ անցնենք՝ խորհրդարանական ընտրությունների անցկացումը միանշանակ անհրաժեշտ է համարում 37,1%-ը: 41,2%-ը կարծում է, որ ընտրությունները պետք է կայանան Նիկոլ Փաշինյանի գլխավորությամբ, 28,2%-ը դրան դեմ է։ Այդուհանդերձ արձանագրենք, որ միայն 28 տոկոսն է դեմ նոր ընտրություններ անցկացնելուն:
Այս թիվը թող Նիկոլին ցույց տան, որ չասի թե հանրային պահանջ չկա ընտրությունների: Բայց այստեղ առաջ է գալիս ցնցող նորությունը: Պարզվում է, եթե արտահերթ ընտրությունները հիմա անցկացվեին, քաղաքացիների 33,1%-ը կընտրեր «Իմ քայլին»:
Հարգելի հայրենակիցներ, նկատեցիք չէ՞, թե որտեղ են ուզում մեզ խաբած լինեն: Պարզվում է՝ հասարակության մեծ մասն ուզում է, որ տեղի ունենան արտահերթ ընտրություններ, բայց եթե տեղի ունենան, նրանք նորից կքվեարկեն Իմ քայլի օգտին: Այսինքն էլ ինչո՞ւ է մարդն ուզում նոր ընտրությունների անցկացում: Դե հենա Իմ քայլը իշխանության ղեկին է էլի: Իսկական աբսուրդի թատրոն:
Իսկ հիմա կուլմինացիան՝ ո՞վ է մեղավոր արցախյան պատերազմում պարտության համար հարցին հարցվածների 32%-ը պատերազմում պարտվելու գլխավոր մեղավոր է համարում նախկին իշխանություններին, 28,8% -ը մեղադրում է Նիկոլ Փաշինյանին և ներկայիս կառավարությանը։ Այո, ինչպես կասեր պողոսապետը՝<<Սաղ Սերժնա մեղավոր>>: Սրան վերաբերում ենք հումորով և անցնում առաջ, քանի որ բոլորս գիտենք, թե առհասարակ պատերազմի ժամանակ ով է պատասխանատու և ով է մեղավոր: Նույնիսկ, եթե Նիկոլ Փաշինյանը օրը 6 անգամ ի սփյուռ աշխարհի հայտարարի. <<Ես թիվ մեկ պատասխանատուն եմ, բայց թիվ մեղավո՞րն եմ>>, միևնույն է՝ դա նրա մեղավորությունը չի փոխում: Ցավոք, բայց ես գիտեմ, որ մեր հասարակության մեջ ապրում են մարդիկ, ովքեր Արցախը միշտ են բեռ համարել: Բայց այս մարդիկ թող իմանան, Արցախը Հայաստանի թիկունքն է, ու Արցախից հետո թուրքը անցնելու է Հայաստանին, այսինքն արդեն անցել է: Պարզվում է հարցվածների մեջ անհայրենիք մարդիկ կան (3,1%), ովքեր նշել են, որ պետք է ճանաչել Ադրբեջանի տարածքային ամբողջականությունը, հանձնել Արցախն ամբողջությամբ ու ավարտել հակամարտությունը:
Անի Առաքելյան
