Պարոն Փաշինյան, էս ովքե՞ր են ձեր հենարանը
ՎԵՐԼՈՒԾՈՒԹՅՈՒՆՆԵՐ
Երեկ Գյումրի քաղաքում մի խումբ մարդիկ հավաք էին կազմակերպել ի աջակցություն Նիկոլ Փաշինյանի և նրա իշխանության: Բազմաթիվ առիթներով ասել եմ, հիմա էլ կրկնեմ՝ եթե Նիկոլ Փաշինյանը, դիցուք, Սյունիքի մարզը, Արարատի մարզն էլ որպես բոնուս, հանձնի Ադրբեջանին, միևնույն է գտնվելու են մարդիկ, ովքեր աջակցելու են Նիկոլին, արդարացնելու են նրա քայլերը, քանի որ ասել եմ, հիմա էլ կրկնեմ՝ նիկոլիզմը ծանր հիվանդություն է, հաճախ չբուժվող: Լավ, խնդիր չկա, ամեն մարդ կարող է ունենալ աջակիցներ, համախոհներ, ինչպես նաև ունենալ մրցակիցներ ու ընդդիմախոսներ: Նիկոլ Փաշինյանը բացառություն չէ, հետևաբար միշտ պետք է ըմբռնումով մոտենալ որևէ մեկին ինչ-որ խումբ մարդկանց կողմից աջակցելու փաստին: Երեկվա հանրահավաքը մեզ հերթական անգամ հիշեցրեց այն, ինչ գիտենք՝ Նիկոլ Փաշինյանը դեռ ունի աջակիցներ, իհարկե՝ սակավաթիվ, բայց ունի: Վարդանանց հրապարակում հավաքվել էին շուրջ 200 հոգի ու բարձրաձայն աջակցում էին Նիկոլ Փաշինյանին: Ի դեպ, եկեք արձանագրենք, որ Նիկոլը լակմուսի թուղթ դարձավ մեր հասարակության համար: Օրինակ, եթե չլիներ Նիկոլը, ո՞վ երբևէ կիմանար, որ Հայաստանում ապրում են 50-ն անց հասուն, մեղսունակ տղամարդիկ, ովքեր Շուշին համարում են ադրբեջանական: Արթիկցի տղամարդկանց տեսանյութը հավանաբար տեսել եք: Կամ, որ չլիներ Նիկոլը, մենք կիմանայի՞նք, որ մեզ հետ, մեր կողքին ապրում են մարդիկ, ովքեր հայտարարում են որ մենք այս պատերազմը հաղթել ենք: Եթե հարցնում եք, թե ով է նման բան հայտարարել, ասեմ՝ Գնել Սարգսյանը:
Հարցնում եք՝ ո՞վ է Գնել Սարգսյանը: Նիկոլ Փաշինյանի աջակից է, ով, ասում են, համատեղությամբ դերասան է, համատեղությամբ նաև Քաղաքացիական Պայմանագիր կուսակցության տարածքային խորհրդի անդամ է: Հիմա, նիկոլական դերասանն հետևյալն է հայտարարել.
«Մենք տանուլ ենք տվել ճակատամարտը, բայց պատերազմը մենք ենք հաղթել ու մեր միասնականության շնորհիվ: Մեզ փորձում են հակառակը ապացուցել, հակառակը ցուցադրել, փորձում են պայքարել ժողովրդի դեմ: Իհարկե, չեն կարող, որովհետև մենք միասնական ենք: Մի փոքր հուսահատություն, ծանր տրամադրություններ կան, սակայն դա բնական է մի երկրի համար, որը գրեթե ոչնչից բանակ է ստեղծում»:
Ես, երբ լսում եմ նման մտքեր, այլևս չեմ զայրանում, բայց, անկեղծ ասած, միշտ զարմանում եմ, թե ո՞նց կարող է հայ տղամարդը այսպես մտածել ու խոսել, լինել այսպիսին: Ես չգիտեմ, թե Գնել Սարգսյանն ինչ քաղաքական շահ է հետապնդում նման անհեթեթություններ շրջակա միջավայր արտանետելով, բայց նա վստահ է, որ Նիկոլ Փաշինյանը ըստ արժանվույն է գնահատելու իր վարքագիծը: Ես վստահ չեմ: Պարզ պատճառով՝ սովորաբար նման մարդկանց արհամարհում են նույնիսկ նրանք, ում գնելսարգսյանանման մարդիկ ծառայում են:
Այդուհանդերձ, երեկվա հանրահավաքը չէր կարող տեղի ունենալ առանց Նիկոլ Փաշինյանի գիտությամբ: Հետևաբար նա առավելագույնը արած կլինի, որ հավաքը մարդաշատ լինի: Բայց… Զավեշտն այն է, որ այլևս Նիկոլ Փաշինյանին սատարող հանրահավաք են կազմակերպում մի չկայացած դերասան, ու հեղափոխության պահապաններ կոչվող մի քանի երիտասարդներ: Նիկոլ Փաշինյանն այլևս քաղաքական դիակ է, դա ապացուցման կարիք չունի:
Կարեն Դանիելյան
