Երկիրը քառակուսի է, մածունը սև է, ժողովուրդն էլ միշտ մեղավոր է
ՎԵՐԼՈՒԾՈՒԹՅՈՒՆՆԵՐ
Արփի Դավոյանին հիշո՞ ւմ եք: Նա Իմ քայլը խմբակցության այն պատգամավորն է, ով վերջերս ասում էր, որ մեր երկրի թիվ մեկ խնդիրը ընդդիմությունն է: Այսինքն՝ ոչ թե գերիների հետ վերադարձը, ոչ թե բանակի կազմաքանդումը կամ Սյունիքում թշնամու կողմից մեր գյուղերի զավթումն, այլ ընդդիմության գոյությունը: Կարար չէ՞ ասեր վատ կամ ոչ կառուցողական ընդիմության գոյությունն է խնդիր, բայց ոչ՝ նա կարծում է, որ առհասարակ ընդդիմության գոյությունն է խնդիր:
Ես այդպես էլ մինչ օրս չհասկացա, թե ինչո՞ ւ պիտի Արփի Դավոյանը աշխատավարձ, ավելին՝ պարգևավճար ստանա հարկատուների վճարած հարկերից, կամ ո՞ր արժանիքի համար է նա ընտրվել պատգամավոր: Դե լավ, ընտրվել ընտրվել է, բայց կարող է չէ՞ խոսելուց առաջ մտածել, դա ոչ փողով ծառայություն է, ոչ էլ բարդագույն ռեբուսի լուծում: Ասել եմ, հիմա էլ կրկնեմ ասածս՝ Արփի Դավոյանը դասական նիկոլիզմի վառ ներկայացուցիչներից է, ում թույլատրված է խոսել, հարցազրույցներ տալ, կարծիքներ ու դատողություններ անել: Ինչո՞ւ, որովհետև կարողանում է պաշտպանել այն քաղաքական գիծը, որը սահմանել է Նիկոլ Փաշինյանը:
Ի՞նչ է պատահել հերթական անգամ:
Այսօր, անդրադառնալով Սերժ Սարգսյանի հարցազրույցի անոնսին, Արփի Դավոյանը չի համաձայնել, որ Սերժ Սարգսյանին մերժել է իրենց թիմը: Նա մասնավորապես նշել է.
«Սերժ Սարգսյանին մերժել է Հայաստանի ժողովուրդը, բոլոր քաղաքացիները: Եթե միայն մեր թիմի մերժելով լիներ, իրադարձությունների նման ընթացք և նման հանգուցալուծում չէր լինի: Այսինքն, այն ինչ տեղի է ունեցել գրեթե 3 տարի առաջ, եղել է ոչ թե մեր թիմի կամքով, այլ Սերժ Սարգսյանի վարած քաղաքականության արդյունքը…»:
Ուզում եմ հարցնեմ՝ տիկին Դավոյան, ինչո՞ւ է ձեր ու մեր ընկալումը միշտ տարբեր: Ինչո՞ւ մենք գիտենք, որ երկիրը կլոր է, իսկ դուք համոզում եք, որ քառակուսի է, ինչո՞ւ մենք գիտենք, որ մածունը սպիտակ է, իսկ դուք մեզ համոզում եք, ավելին՝ ապացուցում եք, որ սև է: Եվ վերջապես, ինձ կբացատրեք, թե ինչո՞ւ պիտի ես աշխատեմ ու հարկեր վճարեմ, իսկ դուք ոչինչ չանելու, ավելին քաղաքական անբովանդակ անհեթեթություններ խոսելու համար աշխատավարձ ու պարգևավճար ստանաք: Ինչո՞ւ:
Հիմա ըստ էության: Արփի Դավոյանը նման է Նիկոլ Փաշինյանին, այսինքն միամիտ չէ: Նա ասում է, որ իրենց թիմին հանկարծ չմեղադրեք Սերժին մերժելու համար: Տիկին Դավոյանն ասում է, որ Սերժին ոչ թե իրենց թիմն է մերժել, այլ ժողովուրդը: Ու նա ակնարկում է, որ եթե թավշյա թամաշայից դժգոհություններ կան, ապա դրա հասցեատերը իրենց թիմը չէ, այլ ժողովուրդը: Սա է դասական նիկոլիզմը: Ժողովուրդը մեղավոր է, որ վարակվում է Կորոնավիրուսով, որովհետև անպատասխանատու է՝ դիմակ չի դնում, ժողովուրդն է մեղավոր, որ աղքատ է, քանի որ չի կարողանում իր գլխում հաղթահարել աղքատությունը, գյուղացին է մեղավոր, որ լավ բերք չի ստանում, քանի որ անգլերեն չգիտի ու փողկապով չի մտնում այգի, մի խոսքով միշտ ըստ այս մարդկանց ժողովուրդն է մեղավոր: Հիմա էլ՝ թե բա ժողովուրդն է մերժել Սերժին, իրենք ի՞նչ կապ ունեն: Այո, ժողովուրդն է մեղավոր, բայց բոլորովին այլ հարցում: Այն հարցում, որ այս մարդիկ մինչև հիմա իշխանության ղեկին են:
Կարեն Դանիելյան
