Միլիոնավոր դոլարների պարգևատրումն ու Ալենի ինքնախաբեությունը
ՎԵՐԼՈՒԾՈՒԹՅՈՒՆՆԵՐ
Այս իշխանությունը պատմության մեջ առաջնահերթ կմնա որպես պատերազմ պարտված իշխանություն, հաջորդիվ՝ կհիշվի որպես ամենաշատը պարգևավճար ստացած իշխանություն: Ընդ որում՝ նիկոլականները պարգևավճարներ ստացել են Կորոնավիրուսի պանդեմիայի ժամանակ, տնտեսական ծանր դրության ժամանակ, պատերազմի ժամանակ: Կապ չունի, թե ինչպիսի իրավիճակ է երկրում, իշխանավորները պիտի ստանան պարգևավճար: Այդուհանդերձ, 2020 թվականին՝ կորոնավիրուսային համաճարակի և պատերազմի պայմաններում, իշխանությունները շարունակել են պետական ապարատում և տեղական ինքնակառավարման մարմիններում 2,5 տարի առաջ արմատավորված ամեն ամիս ճոխ պարգևավճարներ բաժանելու արատավոր պրակտիկան:
AntiFake.am-ի գրավոր հարցմանն ի պատասխան` Պետական եկամուտների կոմիտեից հայտնել են, որ կառույցում 2020 թվականի ընթացքում աշխատակիցներին 6.820.207.205 ՀՀ դրամի պարգևավճար է հատկացվել, որը համարժեք է ավելի քան 14.2 միլիոն ԱՄՆ դոլարին։ ՊԵԿ-ում պատերազմի օրերին՝ հոկտեմբեր ամսին, պարգևատրվել են 496.197.972 դրամի չափով, իսկ պատերազմի ավարտից հետո՝ նոյեմբերին` 474.067.050 դրամի չափով։ Ամենախոշոր պարգևատրումը ՊԵԿ-ում ստացել են տարվա վերջին ամսին՝ դեկտեմբերին` 1.341.069.941 դրամի չափով։ Այսինքն 2020թ.-ին 14.2 միլիոն դոլար պարգևատրում է եղել ՊԵԿ-ում: Չգիտեմ շա՞տ է, թե ոչ: Հայաստանի նման աղքատ երկրի համար, ինչ խոսք՝ շատ է, բայց իմքայլականների համար, կարծում եմ՝ ոչ, որովհետև կարելի է վստահություն հայտնել, որ եթե 20 միլիոն դոլար լիներ, 20-ն էլ կբաժանեին որպես պարգևավճար:
Ի դեպ ԱԺ փոխնախագահ Ալեն Սիմոնյանը վերջերս ասում էր, թե մեղավոր են, որ որոշ մարդկանց բենթլիներն ու դղյակները չհասցրին ԱԹՍ դարձնել: Ինչպես կասեր հայտնի պերսոնաժը՝ իյա, իրո՞ք: Բա ո՞նց հարցնենք պարոն Սիմոնյանին՝ բենթլիներն ու դղյակները ենթադրենք չհասցրեցիք, բա տասնյակ միլիոնավոր դոլարների պարգևատրումները դարձնեիք: Դրանք ուղղեիք ԱԹՍ-ների ձեռք բերմանը: Բա իշխանության գալուց առաջ ասում էիք գալիս եք ծառայելու ժողովրդին: Ծառայելը այսպե՞ս էիք պատկերացնում:
Ինչևէ, պարգևատրվածների իշխանության կարկառուն ներկայացուցիչ հանդիսացող Ալեն Սիմոնյանն այսօր ասել է, թե «այո, վարչապետն այսօր ունի ամենաբարձր քաղաքական վարկանիշը առկա քաղաքական գործիչներով: Չբացառելով, որ «Իմ քայլի,» և մնացած ուժերի վարկանիշը որոշակի առումով իջել է, բայց ես պնդում եմ, որ այսօր վարչապետն ունի ամենաբարձր վարկանիշը»: Տեսեք, Ալեն Սիմոնյանն ասում է, որ Նիկոլ Փաշինյանն ունի ամենաբարձր վարկանիշը: Չգիտեմ՝ ոնց է չափել, բայց ասում է: Ինչ ասես կարող է ասել, լեզվի տակ ոսկոր չկա: Բայց խորհուրդ տանք Ալեն Սիմոնյանին՝ դուրս եկեք փողոց ու պատահական անցորդին ասեք, որ ձեր իշխանությունը համաճարակային ու պատերազմական տարում տասնյակ միլիոնավոր դոլարներ է բաժանել որպես պարգևավճար: Ու դա ասելուց հետո հարցրեք, թե քաղաքացիները ի՞նչ կարծիք ունեն ձեր թիմի և, մասնավորապես, Նիկոլ Փաշինյանի մասին: Նաև խորհուրդ է տրվում վերցնել պաշտպանիչ հանդերձանք:
Անի Առաքելյան
