Լնդերի հիվանդությունները մեծացնում են COVID-19-ի դեպքում բարդությունների հավանականությունը. հետազոտություն

Պարոդոնտիտը լնդերի բորբոքային հիվանդություն է, որը կարող է մեծացնել COVID-19-ի ծանր ընթացքի հավանականությունը: Գիտնականներն այսպիսի ենթադրություն էին կատարել դեռեւս անցյալ տարվա կեսին, եւ հիմա գիտնականների մեկ այլ խումբ գտել է դրա հաստատումը

Պարոդոնտոլոգիայի եվրոպական ֆեդերացիայի (EFP) ամսագրում հրապարակված հետազոտությունն անցկացվել է «պատահական վերահսկման» մեթոդով՝ օգտագործելով Կատարի հիվանդանոցներում բժշկական քարտերի տվյալները, փոխանցում է Medportal.ru-ն: Գիտնականները վերլուծել են 568 պացիենտների տվյալները, որոնց մոտ COVID-19-ը հաստատվել է անցյալ տարվա փետրվարից հուլիս ժամանակահատվածում: Հոսպիտալացման եւ ծանր բարդությունների հետեւանքով թոքերի արհեստական օդափոխության կարիք է ունեցել 40 պացիենտ:

Հետազոտության հեղինակները բոլոր պացիենտների լնդերի հիվանդությունների մասին տվյալներ են հավաքել եւ պարզել, որ նրանց 45 տոկոսի մոտ տարբեր բորբոքումներ են ախտորոշվել: Տվյալները շտկելուց հետո՝ տարիքը, սեռը, քաշը, վնասակար սովորությունները եւ քրոնիկական հիվանդությունները հաշվի առնելով՝ պարզվել է, որ լնդերի խնդիրներ ունեցող պացիենտների շրջանում COVID-19-ի դեպքում բարդությունների հավանականությունը ավելի քան 3 անգամ մեծ է: Ավելին՝ այսպիսի պացիենտների շրջանում 4,5 անգամ ավելի մեծ է թոքերի արհեստական օդափոխության սարքին միացվելու հավանականությունը եւ գրեթե 9 անգամ ավելի մեծ է մահվան ելքի հավանականությունը:

Գիտնականները նաեւ նկատել են, որ հիվանդություններ ունեցող պացիենտների շրջանում արյան մեջ բորբոքման մարկերները զգալիորեն բարձր են եղել, քան այդպիսի խնդիրներ չունեցող մարդկանց մոտ: Գիտնականների կարծիքով՝ սա կարող է ցույց տալ, որ եղած բորբոքային պրոցեսը կարող է վատթարացնել COVID-19-ի ընթացքը: Բերանի խոռոչի բակտերիային բորբոքումը, հավանաբար, նույնպես կարող է նպաստել օրգանիզմում կորոնավիրուսի տարածմանը: